د ولسي جرګې او شوراګانو ټاکنو لپاره د نوماندانو نوم ليکنه پيل شوه
(کابل ټکی کام، ۱۳۹۷، غبرګولی ۵) د افغانستان د ټاکنو خپلواک کمېسيون د ولسي جرګې او ولايتي شوراګانو د ټاکنو لپاره د کانديدانو د نوم ليکنې بهير د پيلولو اعلان وکړ.
د دغه کمېسيون رئيس ګلاجان عبدالبديع صياد وويل، د نوم ليکنۍ دغه لړۍ به د غبرګولي مياشتې له پنځمې (له نن ورځې پيل) او د همدې مياشتې تر ۲۲ نيټې پورې به دوام وکړي.
صياد زياته کړه، د هغوی لپاره چې د راتلونکو ټاکنو لپاره ځان کانديدوي په مرکز او ولايتونو کې امادګي نيول شوې، فورمې ورکول کېږي او کانديدان به يې له ډکولووروسته بيرته کمېسيون ته سپاري.
د ټاکنو کمېسيون وايي، په هر ولايت کې يې د نوماندانو د نوم ليکنې لپاره درې تنه مامورين ګمارلي دي.
د کمېسيون د مهالويش پر اساس، لومړی به د نوماندانو اسناد له پلټنې وروسته د اروزنې لپاره د ټاکنيزو شکايتونو کمېسيون ته استول کېږي، د هغوی له ارزونې وروسته به د ټاکنو خپلواک کمېسيون ته سپارل کېږي.
د انتخاباتو خپلواک کميسيون د راتلونکو پارلماني او ولايتي شوراګانو لپاره د ميزان ۲۸ د ټاکنو د ترسره کېدو نېټه ټاکلې ده.
په داسې حال کې د نوماندانو نوم ليکنه پيل شوه چې تېره ورځ د افغانستان د شفافو انتخاباتو بنسټ “ټيفا” د نوماندانو د نوم ليکنې په پروسه اندېښنه وښوده ويې ويل چې د انتخاباتو خپلواک کمېسيون د يادې پروسې لپاره لازمه امادګي نه ده نيولې، تخنيکي برخې يې ستونزې لري او په دې پروسه کې نيمګړی مديريت او نيمګړی شفافيت هم لوی ګواښ دی.
