(کابل ټکی کام، ۱۳۹۷، غبرګولی ۷) د چین د دفاع وزارت ويلي، چين ته نږدې له لانجمنو ټاپوګانو يې امريکا ته خبرداری ورکړی چې خپلې بيړۍ او الوتکې وباسي.
چين وايي، امریکايي بيړۍ چین ته نږدې په څلورو لانجمنو ټاپوګانو کې ګرځېدلي چې په هغې کې ووډي ټاپو هم دی کوم کې چې د چين توغندي ځای پرځای شوي دي.
د چين دفاع وزارت وايي، امريکا د بيجينګ د ځمکنۍ بشپړتيا خلاف کار کړی او بايد خپلې الوتکې او بيړۍ د چين ټاپوګانو له نږدې سیمو وباسي.
چین مخکې هم جنجالي ټاپوګانو ته نږدې د امریکا بېړیو پر تګ نیوکې کړي او دا کار یې سیاسي او پوځي تېری بللی دی.
دوه اوونۍ مخکې د چين هوايي ځواک وويل، چې سويلي چین سمندرګي ته يې بم غورځوونکې الوتکې استولي دي.
سويلي چین سمندرګی چې مهمه سوداګريزه لاره ده خو پر ملکيت يې شپږ هېوادونه دعوه لري خو چین بيا ټول سويلي چین خپل بولي او وايي چې دوی يې پخواني اسناد لري.
سويلي چين سمندرګی نه يواځې د سوداګرۍ لار ده بلکې دغه سمندرګی د کبانو بډایه ډندونه لري او ويل کېږي چې د ګاز او تيلو زيرمې هم پکې شته.
