په بروکسل کې د ناټو د ناامیدو غړو هېوادونو غونډه
سرلیکنه
په افغانستان کې د روان امنیتي وضعیت په اړه پخپله افغان چارواکي او د امریکا په مشرۍ پر افغانستان یرغل کوونکي د ناټو غړي هېوادونه په افغانستان کې د امن د نه کنټرول له امله ناامیده شوي، چې غواړي د تېر په څېر د بلجیم په پلازمېنه بروکسل کې د دفاع وزیرانو په کچه غونډه وکړي.
د افغان حکومت دفاع او د کورنیو چارو وزیرانو خو په ۲۰۱۵م کال کې پر کندز د طالبانو د کنټرول پر مهال د امنیت ساتلو په اړه خپله بې وسي او ناکامي منلې وه، اوس یې دا دی د کابل ګارنیزیون قوماندان، فضل امان، هم ومنله چې نور د کابل ښار امنیت نه شي ساتلای.
د کابل ګارنیزیون قوماندان، فضل امان، د کابل ښاریانو د امن په ساتلو کې تر ناکامۍ وروسته رسنیو ته ویلي چې په کابل کې د وروستیو مرګونو چاودنو او بریدونه له امله نور د کابل ښاریانو د امن ډاډ نه شي ورکولای، ځکه چې په کابل کې ورځ په ورځ ناامني مخ په زیاتېدو ده او کنټرول یې د دوې په وس کې نه دی.
همدارنګه، د امریکا په مشرۍ د ناټو غړو هېوادونو هم د افغانستان د امنیت پر مخ په خرابوالي اندېښنه ښوولې، ویلي یې دي چې افغانستان ته د نورو پوځونو له لېږلو او افغان حکومت باندې د پراخو میلیاردي ډالرو لګښت سره سره، په افغانستان کې امنیتي وضعیت ورځ په ورځ خرابېږي. د همدې ستونزې د حل لپاره یو ځل بیا د بلجیم په پلازمېنه، بروکسل، کې د ناټو د غړو هېوادونو د دفاع وزیرانو په کېدونکې غونډه کې به د افغانستان د امنیت په اړه بحث وشي.
په بروکسل کې کېدونکې غونډه به د راتلونکې جمعې په ورځ، اتم جون، دایره شي او د افغانستان امنیتی حالات به پکې و ازول شي.
د نورو شویو غونډه په پرتله پکې دا توپیر لیدل کېږي چې تصمیم به یې وروستی تصمیم وي، ځکه په نورو غونډو کې د ناټو غړو هېوادونو دفاع وزیران په افغانستان کې د خپلو ناټو پوځونو او هم د افغان پوځ په اړه ډاډ درلود، خو اوس له دواړو خواوو ډاډ من نه دي، چې نه افغان او نه د ناټو پوځونو په افغانستان کې امن وساتلای شو.
په راتلوکې غونډه کې به د ناټو غړو هېوادونو دفاع وزیران پر دې بحث کوي چې افغانستان ته نور پوځ ولېږي او که له افغان پوځ سره د روحیې په لوړوالي کې مرسته وکړي؟
په بروکسل کې د ناټو کېدونکې غونډه د سختې ناامیدۍ غونډه ده، چې د ناټو د مرستیال ویاند، پیرز کزالې، په وینا، یو پرېکنده تصمیم به پکې نیول کېږي.
د پیرزکزالې له وینا خو داسې جوتېږي چې د بروکسل په غونډه کې د افغانستان د امنیت د ارزولو ترڅنګ به پر دې هم بحث وشي چې نور په افغانستان کې بایللې جګړې ته دوام ورکړي او که نه؟ ځکه دا څلورم ځل دی چې په بروکسل کې د ناټو غړي هېوادونه د افغانستان امنیتي وضعیت ارزوي او د غوڅ ملاتړ د ماموریت پر اغېزمنتوب بحث کوي؛ خو شاید په دې اړه یې دا وروستۍ ارزونه وي.
په راتلونکې غونډه کې د ناټو غړو هېوادونو د دفاع وزیران بله لار نه لري بې له دې چې ووايي افغانستان ته دې نور پوځونه واستول شي. ځکه د افغان او ناټو پوځ په موجودیت کې د افغانستان امنیتي حالات نور هم خراب شول او د کنټرول لپاره یې ناټو ته د پوځونو له زیاتولو پرته بل تصمیم نیول ګټه نه لري.
په بروکسل کې د ناټو د غړو هېوادونو کېدونکې غونډه د ناټو لپاره د سختې ناامیدۍ غونډه ده. افغان امنیتي چارواکي د کابل ښار په ساتلو کې پر خپل پوځ باور نه لري، ولایاتو کې به څرنګه امنیت وساتي، او د ناټو موجوده پوځونو چې په افغانستان کې امن ونه شو ساتلای نور ورلېږونکي پوځونه یې هم نه شي ساتلای.
