تميم توفيق
پاسنی عنوان د يو برتانوي پوځي افسر د ليکنې يوه جمله ده، دغه افسر جو ګلينټون نوميږي، ده په خپله يوه ليکنه کې په ډاګه کړې، چې په افغانستان کې د جګړو او د دوی په اصطلاح د دهشت ګردي لوی لامل د بهرنيو ځواکونو حضور دی.
نوموړي دغه ليکنه په خپل بلاګ (جو) کې تيره ورځ خپره کړې وه، چې افغانستان ته د ۴۰۰ برتانوي عسکرو د احتمالي راتلو په اړه يې ليکلې ده.
جو ګلينټون ليکلي چې ډونالنډ ټرمپ د افغانستان د جګړې لپاره له برتانيا د نورو سرتيرو غوښتنه کړې، ډير احتمال شته چې د برتانیا حکومت ورسره موافقه وکړي. نوموړی وايي: ډير په عمر کې له دې جګړې ځوانان به واستول شي، تر څو هلته مړه شي، دا زمونږ مسؤوليت دی چې د دغسې پېښې د وقوع مخه ونيسو.
دغه برتانوي پوځي افسر په افغانستان د بريد په لومړيو کې د ناټو پوځيانو ملګری و خو وروسته بيرته خپل هيواد ته ستون شو، دی له ډيره وخته د جګړې او په ځانګړي ډول د امريکايي موخو لپاره د برتانوي عسکرو د جنګيدو مخالف دی، له دغه ځايه وه چې نوموړي په ۲۰۰۹م کال کې د دوهم ځل لپاره افغانستان ته له راتلو انکار وکړ، چې د دې مخالفت له امله د برتانيا پوځي محکمې محاکمه او بيا بندي کړ.
نوموړی ليکي: موږ بايد په پيل کې واضحه کړو چې ترڅو په افغانستان کې بهرني ځواکونو پاتې وي، تر هغو هلته سوله نشي راتلای، هلته دهشتګردي (د دوی په ژبه) د بهرني نيواک مستقيمه نتيجه ده.
( د مثال په توګه، په ۲۰۰۶م کې د افغانستان په سهيل هلمند ولايت کې برتانوي عسکر ميشت وو، په لوموړيو کې هلته هيڅ د دهشتګردي نښه نه وه، خو د اشغال د پايلې په توګه نن هلته طالبان يو قوي ځواک دی.)
جو ګلينټون د (Soldier Box) په نوم کتاب هم ليکلی چې دې پوښتنې ته يې پکې ځوابونه ويلي دي (Why I won’t return to the war on Terror) زه به ولې د ترورو ضد جګړې ته ورونه ګرځم.
اوس چې زمونږ په ګران هيواد د امريکا/ناټو د يرغل نژدې دوه لسيزې پوره کيږي، د پخوا په پرتله اوسمهال هم هيوادوال، هم سيمه ييز هيوادونه او هم خپله د يرغلګرو هيوادونو اتباع او حتی پوځونه په دې خبره باور لري چې په افغانستان کې د دغې اوږدې جګړې، بدمرغيو او ناخوالو ستر لامل د بهرنيو اشغالګرو شتون دی.
خو متأسفانه چې د همدې اشغالګرو په زر او زور تر ارګه رسيدلي خلک لا هم د دغه انکار نافذير حقيقت د پټولو او بل ډول ښکارولو کوشش کوي او اوس هم په دې هڅه کې دي د جګړو له امله راپيدا شويو نادودو او مرګونو پړه د اشغال ضد افغانانو په اوږو واچوي.
نه پوهيږو چې دوی د کومې کينه ګرې خاورې په اوبو رالوی شوي چې لا يې هم په مظلومو افغانانو زړه نه بديږي او له بې شمېره مرګونو او نقصانونو سره سره يې لا هم پرې زړه نه دی يخ شوی.
سره له دې چې ډيری د ناټو غړي هيوادونه له مذهبي پلوه له امريکا سره همفکره دي او ضرور يو قدر مشترک لري، خو په دې سربېره هم د (جو ګلينټون) په څير د امريکايي موخو لپاره د ځان او هيوادوالو له قربانولو سره مخالف او ترې انکار کوي، مګر په ارګ کې د واک په ګدۍ ناست په نوم افغان تابعيته، چې له امريکايي اشغالګرو سره په هيڅ برخه کې شراکت نه لري، تر بل هر چا ورته وفادار دي او په ټول توان سره هڅه کوي چې د افغانانو په وژلو او د هيواد په نړولو سره امريکايانو ته د هغوی اهداف په لاس ورکړي.
افغان ولس بايد لومړی د خپلو امريکا ته وفادارو چارواکو مخه ډب کړي؛ ځکه لکه چې ويل کيدل به دغه کورني د اشغالګرو سترګي دي، همداسې وليدل شول، بلکې دوی په خپلو اعمالو ثابته کړه چې له دې زياته يارانه ورسره لري، هم يې سترګې او هم يې لاسونه او پښې دي. نو ولس که غواړي له روان بحران څخه ځان او هيواد وژغوري، بايد دوی هم د اشغالګرو په کټاګوري کې شمار کړي، په هره برخه کې ترې ځان لرې وساتي او داسې مقابله يې وکړي لکه د همدې يرغلګرو چې موږ ته يې دا اوږدې بدمرغۍ راليږدولې دي.
