امریکا له طالبانو سره مخامخ مذاکراتو ته زړه ښه کړی

(کابل ټکی کام ۱۳۹۷ غبرګولی ۱۹)

په داسې حال کې چې امریکایي چارواکو پر طالبانو د سختو جګړو سربیره له ټولوفشارونو څخه کار واخیست او لا هم همدې هڅو ته دوام ورکوي،ترڅو پر هغوی د زور له لارې هرڅه ومني ، تازه د سپینې ماڼې چارواکو له طالبانو سره مخامخ مذاکراتو ته د دریم ګړي په توګه زړه ښه کړی.
د امریکا د جمهور رئیس دونالډ ټرمپ مرستیالې او د مرکزي آسیا لپاره د امریکا د ملي امنیت رئیسې لیزا کورټېس ویلي؛ امریکا چمتو ده چې د طالبانو او افغان حکومت په مذاکراتو کې ګډون وکړي.
هغې ویلي؛ موږ د افغان حکومت ځای نه شو نیولی مذاکرات به د افغان حکومت په رهبري ترسره کیږي او امریکا به یواځې د څارونکي په توګه په کې برخه اخلي.
د کورټیس په خبره؛ امریکا هڅه کوي روانه شخړه د خبرو له لارې پای ته ورسیږۍ.
طالبانو تل ټینګار کړی چې د جګړې اصلي لوری امریکا ده او د بې صلاحیته لوریو سره په مذاکراتو هیڅ وخت نه ضایع کوي.

تر دې وړاندې امریکایي چارواکو په یوه او بله بهانه له طالبانو سره له مخامخ مذاکراتو ډډه کوله.
بل پلو د سولې او مصالحې په برخه کې د ملګرو ملتونو استازي سټېو بروکینګ د امریکا د سولې په انیستیتوت کې د خبرو پر مهال ویلي چې که د بهرنیو ځواکونو په وتلو په افغانستان کې امنیت او ثبات راتللی شي نو باید پر دغه انتخاب هم غور وشي