په امريکا کې د امريکايي رسنيو په وينا: هرمذهب، ګوند او قوم ته ازادي شته، چې په امريکا کې د نورو امريکايي وګړو ترڅنګ ژوند وکړي.
څو کاله وړاندې خپله امريکايي د تورپوستو او سپين پوستو ترمنځ تعصب او توپير ليدل کيده؛ خو اوس امريکايي رسنۍ وايي، چې په امريکا کې د بيان د ازادۍ ترڅنګ د مذهب ازادي هم شته.
خو د تېرې اونۍ راپه دېخوا د جمهوريت غوښتونکي کانديد ډونالډ ټرمپ په هغه وينا چې امريکا ته به د مسلمانانو په ورتګ بنديز ولګول شي، د امريکا ټوله ورکړل شوې ازادي يې تر سوال لاندې راوستې ده.
په امريکا کې د ټولو امريکايانو دا نظر نه ده، چې امريکا ته دې د مسلمانانو په ورتګ بنديز ولګول شي؛ خو امريکايي ټولنه د خپلې امريکايۍ نظريې له مخې د خپلو اهدافو لپاره د خپلو چارواکو د ويناوو ننګه کوي؛ ځکه خو امريکايي مطبوعاتو د ټرمپ وينا په رسنيو کې د اعلاناتو په څېر شېبه په شېبه وړاندې کوي.
د ټرمپ وينا وروسته ترهغې خپره شوه، چې خپله امريکا مسلمانانو ته يوه بهانه جوړه کړه او د کالیفرنیا د پېښې وروسته په امريکا کې د مسلمانانو ژوند تريخ شو.
اوس د لاس انجلس څه ترواشنګټن پورې د مسلمانانو جوماتونه نا امنه دي او د امريکايي متعصبو او اسلام دښمنه اشخاصو لخوا د يوې بدې پېښې د رامنځته کېدو اندېښنې شته .
په دې کړنو سره په امريکا کې مسلمانانو ته زياتې ستونزې راولاړې شوي دي، چې ترټولو زيات په تکزاس ايالت کې د مسلمانانو اسلامي ټولنې او جوماتونه د ګواښ لاندې دي .
راپورونه دا هم څرګندوي، چې د تګزاس په ايالت کې يو شمېر مسلمانان په امريکايي دولت کې د وظيفو څخه هم لاس په سر شوي دي .
امريکا د عراق، سوريې، فلسطين او افغانستان د ولسونو ژوند دومره تريخ کړی دی چې د جګړو په دوام يې اقتصاد د خارو سره خاوری شوی دی.
هغه عراق چې د امريکا د اشغال د مخه د تېلو له پلوه د نړۍ اقتصادي هېواد بلل کيده اوس په وروسته پاتې هېوادونو کې شمېرل کېدوته نږدې شوی دی.
افغانستان چې د روسانو داشغال تورې ورځې او سرې لمبې پرې تېرې شوي، خو په نړيواله کچه په وروسته پاتې هېوادونوکې نه و شمېرل شوی.
د ملګریو ملتونو د پرمختيايي پروګرام (UNDP) د کلني راپور په اساس چې د ۱۸۸ هېوادونو سروې يې کړې ده دروغتيا زده کړې، عايداتو، ساسي او مدني فعالیتونو په اړه يې راپور ترلاسه کړی دی؛ افغانستان يې په اسیا کې تر ټولو پاتې او په اقتصادي لحاظ د خارو لاندې حساب کړی دی .
په پرمختللو هېوادونو کې ايران ، چين، تاجکستان، او تر ټولو پرمختللی هېواد ناروې ښودل شوی.
ورپسې استراليا، سويس او هالنډ يادونه شوې ده، چې دا د اسلامي نړۍ پرخلاف او په ځانګړې توګه د افغانستان او مسلمانانو سره چلند دی چې په اصل کې امريکا په نړۍ کې د اسلام د خپریدا څخه انديښنه لري؛ ځکه يې د اسلامي هېوادونو په خلاف او امريکا ته د مسلمانانو په ورتلو بنديز ياد کړی دی.
