(کابل ټکی کام، ۱۳۹۷، وږی ۶)
د ننګرهار عدلي او قضايي مسوولين وايي، د دغه ولايت له مرکزي محبس څخه پنځه ويشت تنه زندانيان خوشې شول.
د استيناف څارنوالۍ رییس خالد احمد اوريا وايي، دا زندانيان د ولسمشر د اتمې ګڼې د فرمان پر اساس له بنده خوشې شوي دي.
په یادو زندانيانو کې دوه ميرمنې او پاتې نارينه دي چې د بند موده يې تر پنځو کلونو وه خو د بخښنې او تخفيف په پايله کې خوشې شوي دي.
د اوريا په وينا، د خوشې شوو کسانو له ډلې ډيری يې په جنايي جرمونو تورن و.
وخت ناوخت د ولسمشر د ځانګړي فرمان له مخې د هېواد له بېلابيلو زندانونو يواځې هغه بنديان خوشې کېږي چې په جنايي جرمونو ککړ وي او ډيری هغه چې په سياسي تورونو او د طالب په نوم زندان ته اچول شوي وي که مرګ حال ناروغ او یا هم کبرسن وي خو د مسوولينو له لوري ورته هيڅ پاملرنه نه کېږي.
دا مهال د ننګرهار په عمومي محبس کې ۱۷۶۱ ساتل کېږي چې له ډلې يې اووه ويشت تنه ميرمنې دي.
