طالبان: د داعش له منځه وړلو لپاره یې له روسیې سره خبرې نه دي کړي

کابل ټکی کام ۰۴جدې/۱۳۹۴، احمدالله مهاجر
 څو ورځې وړاندې د افغانستان لپاره د روسیې استازي ښاغلي ضمیر کابلوف وویل چې په افغانستان کې د داعش د له منځه وړلو لپاره یې له طالبانو سره خبرې کړي دي.
د طالبانو ویاند مونږ ته د ایمیل له لارې یوه اعلامیه را استولې ده چې پکې ویل شوي دي، د داعش د له منځه وړلو لپاره یې له روسیې سره خبرې نه دي کړي.
په اعلامیه کې راغلي دي چې د امریکا اشغال ته د پای ټکي اېښودلو لپاره یې له سیمه ییزو هېوادونو سره تماسونه نیولي دي او لا یې هم نیسي، او دا یې خپل مشروع حق بللی دی.
اعلامیه کې راغلي دي، « خو په اصطلاح د داعش په ضد موږ دهیچا همکارۍ ته اړتیا نه لرو او نه مو هم له چاسره په دې ارتباط تماس نیولی او نه مو خبرې کړې دي.»
اعلامیه کې داعش ډله غرب پاله بلل شوې ده،«په افغانستان کې د داعش له نامه څخه ځیني کسان ناوړه استفاده کوي او کورني او بهرني استخبارات یې د خپلو شومو اهدافواواشغال اوږدولو لپاره تایید او مرسته کوي، دا پديده افغان ولس ته د منلو نه ده، اسلامي امارت د خپل ولس د ريښتوني استازي په توګه تر ډیره حده د نوموړي تهدید په نامه پروژّه له منځه وړې او اوس د هېواد په ۳۴ ولایتونوکې یوازې د یوه ولایت په یوه څنډه کې پاته دي چي د تشویش وړ نه دي.»
طالبانو په اعلامیه کې ویلي دي چې افغان مجاهد ولس د الله په فضل او مرسته باندې په تېرو ۱۴کلونو کې له ۴۹ ملکونو سره او د دوی د څنګ ملګرو (افغان حکومت) سره مقابله وکولی شوای، نو داعش خطر به هم ان شاءالله له منځه یوسي، چې تر ډېره حده یې له منځه هم وړی دی.