د افغانستان د بیا رغاونې په نوم ادارې (سیګار) په خپل تازه راپور کې ویلي چې حکومتي او بهرنیو ځواکونو د تیرو اتو کلونو په پرتله په روان کال کې په ولسي وګړو او طالبانو زیاته بمباري وکړه، خو بیا يې هم د هغو سيمو، چې طالبانو نیولې وې، د بیرته نیولو پر ځای نورې سیمې هم له لاسه ورکړې دي.
غربي رسنیو هم منلې چې افغان او بهرني پوځونه نور په افغانستان کې د طالبانو په مقابل کې د جګړې توان نه لري، طالبان ورځ په ورځ د خپلو بریدونو په دوام له حکومته سیمې نیسي او امکا ن لري تر اویا سلنه زياته خاوره د طالبانو لاس ته ورشي.
مخکې به چې سیګار په افغانستان کې د پوځي یا ملکي وګړو د مرګ ژوبلې په اړه راپور ورکاوه؛ نو د ملکي وګړو د مرګ ژوبلې ګوته به يې دواړو لورو (حکومت او طالبانو) ته نیوله، خو اوس وايي چې بهرنیو ځواکونو له افغان ځواکونو سره په ګډه په افغان ملکي وګړو بمبارۍ کړې او مرګ ژوبله يې ورته اړولې، په تیرو اتو کلونو کې حکومت او بهرنیو پوځونو نه په دومره کچه بمباري کړې وه او نه يې دومره خاوره له لاسه ورکړې وه.
په افغانستان کې چې روانه جګړه له تیرو کلونو سره پرته کړل شي، ظاهره شي چې پر غزني له بریده وروسته د حکومتي ځواکونو پښې ډیرې ښویېدلې دي؛ ځکه خو يې له درې میاشتو راهیسې ۱۶سلنه نوره خاوره هم له لاسه وتلې ده. که د افغان او بهرنیو پوځونو بمباریو او ځمکنیو شپنیو عملیاتو ته ته وکتل شي؛ نو باید دا مهال حکومت له طالبانو ټولې هغه سیمې چې ترې نیولې يې دي، بیا تر خپل کنترول لاندې راوستې وای، خو طالبان چې غربي رسنۍ يې په ليکو کې د اختلاف تبلیغات هم کوي، لا هم د متحد خوځښت په شکل پر بهرنیو او افغان پوځونو بریدونو ته دوام ورکوي.
په افغانستان کې میشتو بهرنيو پوځونو او خپله افغان ځواکونو باید د بهرنيو مليونونو ډالرو مرستو په توسط له طالبانو ډیرې سیمې بیرته نیولې وای، خو دا چې د حکومت په داخل کې د اداري فساد کچه ورځ په ورځ لوړیږي، د دې لامل شوې چې ياد پوځونه د پرمختګ پر ځای شاتګ وکړي، په نظامي ډګر کې د يادو پوځونو له ناکامي ثابتيږي چې افغان دفاع وزارت او هغه لوړ پوړي چارواکي، چې له بهره ورته د پوځي موخو لپاره ملیونونه ډالر سپارل کیږي، ټول شخصي بانکي اکاونټونو ته لیږي.
د هيواد د۷۰ سلنې خاورې له لاسه ورکولو ته خپله دفاع وزارت زمینه برابروي، داسې چې په لرو پرتو ولسواليو کې جنګیدونکو پولییسو ته په میاشتو میاشتو خوراک او معاشات نه ور کول کیږي، هغوی اړ دي چې یا تسلیم او یا له جګړې تیښته وکړي او ولسوالۍ يا نظامي مرکزونه طالبانو ته پریږدي.
د حکومت ۱۱ لوړپوړو چارواکو له استعفاګانو هم ښکاري چې نور دفاع وزارت ځان نه شي ساتلی، ورځ په ورځ يې د جګړې په ډګر کې ناکامۍ زياتږي، چې له امله يې حکومتي چارواکي يو په بل پسې استعفا وړاندې کوي. ګورو به چې د دې مخ په ځوړ پوځي وضعيت له امله به اشرف غني استعفا کوي او که له هیواده به تښتي.
که څه هم په کابل کې د امریکايي ځواکونو پخواني قومندان جنرال جان نیکولسن د ۲۰۱۷ کال په نومبر کې ویلي و، چې افغان امنیتي ځواکونه به په راتلونکو دوو کلونو کې ۸۰ سلنه خاوره په خپل کنټرول کې راولي، خو دا دی له بمبارونو سره سره یې نوره خاوره هم له لاسه ورکړه.
د طالبانو لخوا په ۷۰ سلنه خاوره کنترول په لومړي ځل په کابل کې د امریکایي پوځونو قوماندان سکاټ میلر ومنله، نوموړي د طالبانو د دې برلاسي په سبب اعتراف وکړ چې د افغانسان مسئله پوځي حل نه لري او باید سیاسي حل لاره ورته ولټول شي.
