(کابل ټکی کام ۱۳۹۷ مرغومی ۸)
په داسې حال کې چې د طالبانو او امریکایانو تر منځ د بهرنیانو د نیواک په برخلیک خبرې پیل شوې او ورسره همهاله په هیواد کې پر ولسي خلکو د افغان او امریکایي ځواکونو هدفمندانه عملیات لوړ شوي، تازه د ملي یووالي د حکومت د جګړې او استخباراتو مشرانو طالبانو ته ګواښوونه کړي.
د ملي امنیت سلاکار حمدالله محب نن ورځ د دفاع وزیر اسدالله خالد د معرفي کیدو په مراسمو کې وویل، ځواکونه به یې د هغو وسلوالو پر وړاندې چې د بهرنیانو په نفع جګړه مخته وړي، ګړندي ګامونه واخلي.
نوموړی دغه راز وویل، سوله له هغو کسانو سره شونې ده چې جګړه نه غواړي او په مسالمت آمیزه توګه له حکومت سره یوځای شي.
په یادو مراسمو کې د ملي دفاع نوي وزیر اسدالله خالد ګواښ وکړ چې تر دې وروسته به د طالبانو سرونه وهي او سنګر به ترې نیسي.
نوموړي دغه راز وویل، چې افغان ځواکونه به له دفاعی حالت څخه تهاجمي حال ته اماده کوي او پر طالبانو به توند ګوزارونه پیلوي.
بلخوا بیا د دفاع وزارت ویاند غفور احمد جاوید ویلي، چې عملیات د دې په خاطر زیاتوي چې طالبان کمزوري کړي او د زور له لارې یې مجبور کړي، څو له حکومت سره د حکومت پر شرایطو مذاکراتو ته چمتو شي.
شنونکي وایی، د حکومت ګواښوونه یواځې ولسي افغانانو ته دي ؛ چې تر ډیره یې په عملیاتو کې هغه کسان چې ملکي او بې طرفه وي ، په نښه کیږي، کورونه، جوماتونه، مکاتب او مدارس یې بمبار او وحشیانه چلند ورسره کیږي، چې دې حالت د دې پرځای چې مقابل لوری تضعیف کړي، لا یې د حکومت او بهرنیانو پر وړاندې پاڅون ته هڅولي دي.
