(کابل ټکی کام ۱۳۹۷ مرغومی ۹)
طالبانو د “ورځې خبره“ تر عنوان لاندې مقاله کې چې د دوی رسمي نظر څرګندوي یوځل بیا ټینګار کړی چې د روانې معضلې اصلي ټکی د امریکایانو جګړیز حضور ده او تر هغه چې د “اشغال“ د ختمولو پر سره له امریکا سره توافق ته نه وي رسیدلي، له حکومت او نورو ډلو ټپلو سره مذاکرات د وخت ضیاع بولي.
مقاله کې ویل شوي؛
“ دکابل رژیم چې دروان اشغال زېږنده او د امریکایانو د ګټو او ستراتیژیکو منافعو یوه استخباراتي پروژه ده هیڅکله ددې واک اوصلاحیت نلري چې دجګړي دپای ته رسیدو په اړه کوم وړوکی تصمیم هم ونیسي“
طالبانو د لویدیځو رسنیو له خوا د نیمایی امریکایی عسکرو د ایستلو موضوع ته چې د دولتي چارواکو او د ولسي او مشرانو جرګې غبرګونونه او اندیښنې یې راوپارولې ویلي“ دکابل رژیم دغه وارخطايی د دې خبري لوی ثبوت دی چې که امریکايی عسکر نه وي ددوئ به کوم حشر اوبرخلیک وي“
طالبان وایي، له امریکایي لوري سره یې له شک پرته ګټور مذاکرات کړي او په وینا یې چې “ که دغه مذاکرات په همدې تودوخي اوجدیت روان وي ممکن د اشغال پای ته رسېدو ته اساسي اوسوله ییزه حل لاره وموندل شي“
طالبانو له امریکایانو سره د راتلونکو ناستو امکان نه دی رد کړی او ویلي یې دي چې ښایي ورته ناستې له امریکایي لوري سره په راتلونکي کې هم ترسره شي.
په مقاله کې ویل شوي “ امریکایان هم په دې لټه کې دي چې نور د افغانستان دجګړې له درانه بار اوخجالت څخه اوږې سپکي کړي “
طالبان وایي، د غوپرمختیاوو دکابل ادارې په ګډون په هغوجهتونو چې خپل وجود اوژوند په جنګ او جګړو کې ویني ځمکه ورباندي سره تبۍ وګرځیده په زیاتي رسوايي یې زهرجنو تبلیغاتو او نورو تحرکاتو ته لاس واچاوو ترڅو د مذاکراتو موثریت ته ټکان ورکړي او د افغانانو په امیدونو خاوري واړوي.
طالبان داسې مهال دا څرګندونې کوي چې تیره ورځ یې یوځل بیا هغه راپورونه رد کړل چې ګواکې مرکچي پلاوی به یې د سعودي په راتلونکې غونډه کې له افغان چارواکو سره وګوري او پر بهرنیانو یې هم غږ وکړ چې د بیځایه هیلو ورکولو دې ډډه وکړي.
