(کابل ټکی کام ۱۳۹۷ مرغومی ۹)
له څو ورځو چنو وهلو او جنجالونو وروسته د ټاکنو خپلواک کمیسیون اعلان وکړ چې د جمهوري ریاست ټاکنې به په درۍ میاشتې ځنډ سره ترسره کیږي.
په پام کې وه چې راتلونکې ټولټاکنې د وري (حمل) په ۳۱مه نېټه ترسره شي چې د ټاکنو کمیسیون د مشکلاتو او بودیجې د نشتون له امله به اوس په درې میاشتني ځنډ سره د چنګاښ پر ۲۹ تر سره شي.
ولسمشرۍ ماڼۍ له دغه مهالوېشه هرکلی کړی دی او د ارګ مرستیال ویاند شاه حسین مرتضوي ویلي چې ولسمشر او د ارګ ټول چارواکي د ټاکنو کمیسیون له دې پریکړې ملاتړ کوي.
دغه راز د نوي مهالوېش له مخې به د افغانستان ولسمشریزې، ولایتي شوراګانو، ولسوالیو شوراګانو او د غزني د ولسي جرګې ټاکنې ۶ میاشتې وروسته د چنګاښ (سرطان) په ۲۹مه ترسره شي.
تر اوسه ۶۱ کسانو جمهوري ریاست ته د نوماندۍ په موخه مالوماتي فورمې ترلاسه کړې ، خو هېڅ یو یې نه دی توانیدلی چې شرایط پوره کړي.
د ټاکنو د احتمالي ځنډ په تړاو له وړاندې احتمالي نوماند حنیف اتمر اندیښنه ښوودلې وه او حکومت ته یې خبرداری ورکړی وو، خو د ټاکنو کمیسیون تر رسمي اعلان وروسته کوم احتمالي نوماند تر دې دمه غبرګون نه دی ښوودلی.
سرچینې وایی، چې د انتخاباتو کمیسیون د بهرنیانو تر فشار لاندې وه او هغوی ترې شپږ میاشتنی ځنډ غوښت او له همدې امله یې تر اوسه د ټاکنو بودیجه هم نه ده ورکړې.
