(کابل ټکی کام، ۱۳۹۷، مرغومی ۱۳)
د افغانستان حکومت د وچکالۍ د سيلابونو له کبله د ځمکو د تخريب مخنيوي په موخه په ۳۴ ولايتونو کې د پنځو دريايي حوزو لپاره د سيمې جاليو د پېرلو او لېږد قرارداد لاسليک شو.
د یادې پروژې قرارداد د انرژې او اوبو وزارت سرپرست محمد ګل خًلمي او د رحيم ګرديزي او مصطفی ميتل لمېټډ د شرکتونو مسوولینو سره لاسليک شو.
د دغه پروژې د لاسليکولو پر مهال ولسمشر غني وويل، چې د ګبیون پروژې په پلي کولو سره به د لومړي ځل لپاره د سېلابونو د خطرونو او د ځمکې او املاکو د تلفاتو مخنیوی وشي او دا کار د اوبو د مدیریت لامل هم ګرځي.
نوموړي زياته کړه، د دغه پروژې کې به د کم لګښت په موخه په سيمې جاليو کې له وطني ډبرو اسفتاده کېږي.
د حکومتي مسوولینو په وينا، د یادې پروژې له پلي کېدو سره به تر ۱۷۹ زره ډيرو کسانو ته د کار زمینه برابره شي.
د تخار، بدخسان، کندوز او بلخ ولايتونو کې یو شمير اوسېدونکو تر دې مخکې شکايتونه کړي چې د آمو سيند يې لسګونه جريبه ځمکې، کورونه او باغونه ويجاړ کړي دي او لا هم د دغه سيند څخه يې ځمکو ته ګواښونه شته دي.
حکومت وايي، د پنځو دريايي حوزو د سيندونو د استنادي ديوالونو پروژې پيلېدو سره به د امو سيند څخه د ځمکو خطره يو څه کمه شي خو په عين حال کې ځينې متخصصين په دې باور دي چې په لنډ وخت کې په پنځو سترو دريايي حوزو د دغه پروژې عملي کېدل ممکن نه دي، ښايي دغه پروژه پنځه کاله وخت ونيسي.
