(کابل ټکی کام، ۱۳۹۷، مرغومی ۱۳)
د بغلان د ولايتي شورا رئيس محمد صفدر محسيني وايي، طالبانو تيره شپه دولس بجې د ښار مربوط په درېيمه امنيتي حوزه او د شاهرا پوليسو پر کنډک بريد کړی چې عسکرو ته پکې مرګ ژوبله اوښتې ده.
د محسينې په وينا، طالبانو په ياده سيمه کې د امنيتي ځواکونو يوه پوسته نيولې او سوځولې زياتوي په جګړه کې اته پوليس وژل شوي او دوه تنه نور ټپيان دي.
يوې بلې امنيتي سرچينې د نوم نه ښودلو په شرط ويلي، د طالبانو په دغه حمله کې د هغوی ليزري قطعې هم شتون درلود او په پايله کې يې درېيمه حوزه نيولې او سوځولې ده.
د سرچينې په وينا، په درېيمه حوزه کې درې پوليس وژل شوي او دوه تنه نور لادرکه دي په خبره يې په (حدبخشي) پوسته کې د شاهرا د پوليسو د کنډک اووه عسکر وژل شوي دي.
له بله پلوه طالب وياند ذبيح الله مجاهد کابل ټکی کام ته په رالېږلې خبرپانه کې ويلي، چې د پلخمري ښار درېيمه امنيتي حوزه او يوه پوسته يې تيره شپه د جګړې په ترڅ کې نيولي دي.
نموړی زياتوي، په دغه جګړه کې شل پوليس وژل شوي چې جسدونه يې لا هم د جګړې په ډګر پاتې دي، په وينا يې د جګړې په پايله کې درې عرادې موټر، په زياته اندازه سپکه او درنه وسله او نور نظامي توکي هم د طالبانو لاسته لوېدلي دي.
د مجاهد په وينا، په ټوله جګړه کې یو طالب وسله وال وژل شوی دی.
