(کابل ټکی کام ۱۳۹۷ مرغونی ۱۶)
یو شمیر سرچینو په ډاګه کړې چې ټاکل شوې راتلونکو دوو ورځو کې د زلمي خلیلزاد په مشرۍ د امریکایانو یو مرکچي پلاوی، له طالبانو سره د قطر په پلازمینه دوحه کې د خبرو څلورم پړاو پیل کړي.
سرچینو ویلي، دا ځل به له کوم دریمګړي لوري پرته یواځې طالبان او امریکایي استازي مخامخ خبرو ته سره کیني.
طالبانو او او امریکایي چارواکو د دې خبرو په هکله رسماً څه نه دي ویلي، خو ځینو طالب سرچینو د دغه خبر پخلی کړی دی.
دا په داسې حال کې ده چې حکومت هیله درلوده چې راتلونکي کې به په سعودي کې د طالبانو او امریکا ترمنځ یوه غونډه جوړه او دولتي استازی به له طالبانو سره مخامخ مذاکراتو کې ګډون وکړي، خو طالبانو ویلي چې د سعودي غونډه د دوی د پلان برخه نه ده.
سرچینې دغه راز وایي، د قطر په غونډه کې به دواړه لوري (امریکا او طالبان) پریکنده خبرې سره وکړي او شونې ده کوم ممکنه جوړجاړي ته سره ورسیږي.
