(کابل ټکی کام، ۱۳۹۷، مرغومی ۱۶)
د بدخشان ولايت په کوهستان ولسوالۍ کې د تونل نړيدو له کبله دېرش کان کېندونکي وژل شوي او لسګونه نور ټپيان شوي دي.
د بدخشان د والي وياند نيک محمد نظري وايي، دغه پېښه نن د یک شنبې په ورځ لس بجې د يادې ولسوالۍ په شِپو سيمه کې رامنځته شوې ده.
که څه هم نظري وايي، یو شمېر زر مېنځونکي په خپل لاس د کېندل شوي تونل نړېدو له کبله تر خاورو لاندې شوي چې کره شمير يې نه دی معلوم خو سيمه ييزو سرچينو رسنيو ته ويلي په ياده پېښه کې دېرش کسان وژل شوي او لسګونه نور ټپيان شوي دي.
له لومړيو کې د شل کسانو د مړه کېدو راپورونه ورکول شوي و، خو وروسته د کوهستان ولسوال محمد رستم راغي رسنيو ته د دېرش کسانو د مړه کېدو او اووه تنه نورو ټپي کېدو خبر تاييد کړ.
چارواکي وايي، ژغورونکې ډله سيمې ته لېږل شوې او په تونل کې د بندو کسانو د راويستلو هڅې روانې دي.
د بدخشان د طبيعي پيښو پر وړاندې د مبارزې مشر عبدالله همايون دهقان وايي تر اوسه د شل کسانو مړي او اووه ټپيان را ايستل شوي په وينا يې په دغه معدن کې تر پنځوس کسانو پورې ناقانونه کېندنې کولې چې دېرش کسان لا هم لادرکه دي.
بدخشان د افغانستان په شمال کې غرنی ولايت دی چې وخت ناوخت ترې د طبيعي پېښو راپورونه ورکول کېږي.
