(کابل ټکی کام ۱۳۹۷ کب ۱)
وروسته تر هغه چې افغان او امریکایي ځواکونو د کاپیسا ولایت د تګاب ولسوالۍ په بدراب سیمه کې
د “حمیدالمدارس” په نوم سل کلنه پخوانۍ دیني مدرسه وسوځوله او ساختمان یې له خاورو سره خاورې کړ، طالبانو یې پر وړاندې توند غبرګون ښوودلی دی.
طالبانو پر یادې مدرسې د برید د غندلو تر څنګ خپلو پلویانو ته د تر ټولو سخت انتقام اخیستلو سپارښتنه کړې ده.
د طالبانو په اعلامیه کې ویل شوي،
“ اسلامي امارت مجاهدینو ته لارښونه کوي چې د دغه جنایت په بدل کې د اشغالګرو او د هغوی د غلامانو په حساسو استخباراتي مراکزو او د شر په طرحه کونکو ځالو باندې د لویو او درنو ګوزارونو لپاره خپله تابیا ونیسي. “
طالبانو دغه راز له اولسونو، نړیوالو بې پرې نهادونو او رسنیو څخه هم غوښتنه کړې چې د ښوونځي او مدرسې توپیر دې نه کوي او له خپلو ملي او مذهبي ارزښتونو دې کلکه دفاع وکړي “ لکه څرنګه چې موږته د علم او پوهې په پلوۍ له ښونځي او پوهنتون څخه دفاع اړینه ده همدا ډول د دې خاورې له مسجد او مدرسې څخه هم دفاع کول د ټول اولس ديني او هیوادنۍ دنده ده چې باید ورڅخه ويې کړو“
د طالبانو په وینا پاڼه کې راغلي ، امریکایان غواړي په دې هیواد کې د دین جرړې وباسي، د رښتینو علماءوو د روزنې مراکز له منځه یوسي او په دې توګه خپل ناولي اشغال ته په خلاص مټ د اوږدیدا زمینه مساعده کړي.
طالبانو د کمونستي بلاک ماتې هم د مدارسو او مقدسو ځایونو ته د هغوی سپک نظر کول ښوودلي او زیاته کړې یې ده چې، په دې هیواد کې پروني کمونستي بلاک ځکه ماتې وخوړه چې هغوی د دې ملت د دیني اساساتو او شعایرو د له منځه وړلو هڅه کوله او د کمونیزم کفري مفکوره يې په دې اولس تپل غوښتل.
د یادونې وړ ده چې دغه مدرسه چې د میاګل جان آغا په مدرسه سره هم مشهوره وه او سل کلنه تاریخي مخیینه یې درلوده وړمه شپه د امریکايانو او د هغوی د داخلي ملاتړو په چاپه کې له ټولو کتابونو او درسي توکو سره یوځای وسوزول شوه.
د سیمې خلک وایي، یادې مدرسې په تیرو څه باندې سلو کلونو کې هیواد ته زرګونه علماء کرام د دیني خدمت لپاره روزلي وو
