میدان وردګ: په بمبار او شپنيو عملياتو کې شل ملکي وګړي وژل شوي
(کابل ټکی کام، ۱۳۹۷، کب ۴)
د ميدان وردګو ولايت په جلکې ولسوالۍ کې د ګډو ځواکونو په بمبارۍ او شپنيو عملياتو کې ګڼ کورونه ويجاړ او شل ملکي وګړي وژل شوي دي.
د راپورونو له مخې، دغه عمليات د يادې ولسوالۍ په شرتوغي سيمه کې د جګړن په نوم د يوه تن کور بمبار شوی چې د جګړن په شمول د هغه د کورنۍ نهه کسان چې ميرمنې او کوچنيان هم پکې دي وژل شوي.
ځايي باوري سرچينې وايي، دغه راز د شرتوغي کلي په مسجد هم بمباري شوې چې پنځه تنه عام کليوال پکې وژل شوي دي.
همدارنګه په چتو کلي کې يې د غفار او ملاخان په نومونو د عامو خلکو کورونه بمبار کړي چې ګڼ کسان پکې وژل شوي او خلک يې له خاورو څخه د جسدونو په را ايستلو بوخت دي.
د سرچينې په وينا، په دورانيو کلي کې يې هم بمباري کړې چې يو تن سپين ږيری پکې وژل شوی او د یادې ولسوالۍ مربوط د بابک په کلي کې يې يوه مدرسه نړولې چې د مدرسې يو زده کوونکی پکې وژل شوی دی.
ويل کېږي، ښايي په عملياتو او بمبار کې د وژل شويو کسانو شمير له دې هم زيات شي ځکه چې لا هم ځايي خلک له خاورو څخه د جسدونو په رايستلو بوخت دي.
طالبان وايي، پر خلکو عمليات او بمبارۍ د داخليانو او بهرنيانو وحشت دی او ياند يې په دې اړه په يوې خبرپاڼه کې ويلي : “دغه وحشتونه په داسې حال کې ترسره کیږي چې اشغالګرو او ګوډاګیانو يې د هیواد په مختلفو سیمو کې په عام ډول د ملکي خلکو وژلو او بمبارونو ته زور ورکړی او هره ورځ ملکي هیوادوال ( سپين ږيري، ښځې اوماشومان) په شهادت رسوي، بیا د مجاهدینو نوم ورکوي خپله لاسته راوړنه يې بولي او په افتخار سره يې اعلانوي.”
دا په داسې حال کې ده، چې همدا تيره شپه د میدان وردګو ولايت اوسېدونکو ويلي و چې د شپنيو عملياتو او چاپو له کبله تر پوځې راغلي او ځايي اوسېدونکي له خپلو سيمو او کورونو کډه کولو ته اړ شوي دي.
