هندي الوتکو پر پاکستاني کشمير هوايي بريد کړی
(کابل ټکی کام، ۱۳۹۷، کب ۷)
هندي رسنۍ وايي، تيره شپه د درې بجو په شاوخوا کې هندي جنګې الوتکو پر پاکستاني کشمير هوايي برید کړی او ځينې سيمې يې په نښه کړي دي.
د پاکستان پوځ هم تاييد کړې چې هندي جنګي الوتکې د پاکستان هوايي حريم ته داخلې شوي او په ځواب کې يې پاکستان هم یادې سيمې ته خپل پوځ استولی دی.
هندي رسنۍ ليکي، جنګي الوتکو پاکستاني کشمير کې د جنګياليو يو مرکز په نښه کړی خو ځينې سرچينې بيا وايي چې هندي جنګي الوتکو په بالاکوټ او مظفر اباد سيمو پروازونه کړي دي.
د ای ان آی چې دفتر يې په دهلي کې دی خبر ورکړی چې د هند دولس ميراج دوه زره ډوله الوتکې د کشمير له کرښې اوښتي او د جنګياليو يو مرکز يې هدف ګرځولی خو د هند دفاع وزارت تر اوسه په دې اړه څه نه دي ويلي.
د پاکستان د پوځ وياند اصف غفور تاييدوي چې د هندي الوتکو هوايي حريم کراس کړی او پاکستاني کشمير ته اوښتي دي.
په هندي کشمير پلواما سيمه کې پر هندي ځواکونو له سرتيري بريد وروسته د دواړو هېوادونو تر منځ اړیکې د جګړې تر بريده رسېدلي او يو بل ته يې ګواښونه کړي دي.
دغه راز تيره ورځ د خيبر پښتونخوا د روغتونونو سکرتر ډاکټر سيد فاروق جميل رسنيو ته ويلي، چې د هند له ګواښ وروسته د خيبر پښتونخوا ټولو ملکي او دولتي روغتونونو ته امر شوی چې ۲۵ سلنه روغتياي بسترې تيارې وساتي.
