پاکستاني کشمير کې د هند دوه جنګي الوتکې نسکورې شوي
(کابل ټکی کام، ۱۳۹۷، کب ۸)
رويټرز اژانس خبر ورکړی چې د هند يوه جنګي الوتکه نن د چهارشنبې په ورځ د پاکستاني کشمير خواته نسکوره شوې چې دوه پيلوټان او يو ملکي کس پکې وژل شوي دي.
له بله پلوه د پاکستان پوځ اعلان کړی چې د هند دوه جنګي الوتکې يې د پاکستان تر واک لاندې کشمير کې نسکورې کړي دي.
د پاکستان د پوځ وياند اصف غفور ويلي، د دو هندي الوتکو د نسکورولو تر څنګ يو هندي پيلوټ ژوندی هم نيول شوی دی.
له بله پلوه هندي چارواکي وايي، چې نن د چهارشنبې په ورځ درې پاکستاني جنګي الوتکې د هند تر واک لاندې سيمې ته داخل شوي چې له امله يې د سرينګر هوايي ډګر د څو ساعتونو لپاره تړل شوی و.
د هند پوځ په کشمير کې د خپلې يوې جنګي الوتکې نسکورېدل تاييد کړي وايي، د تخنيکي ستونزو له کبله نسکوره شوې ده.
په کشمير کې پر هندي ځواکونو تر سرتيري برید وروسته چې لسګونه هندي عسکر پکې ووژل شول د پاکستان او هند اړيکې ترينګلي شوي دي.
هندي الوتکې پرون د پاکستان تر واک لاندې په کشمير هوايي بريدونه وکړل چې د هندي چارواکو په وینا لسګونه د جیش محمد ډلې وسله وال يې وژلي خو پاکستان بيا وايي دغه بريدونه پر ملکي ميشت ځايونو شوي دي.
