کندهار: په بهرنیو ځواکونو چاودنه شوې
(کابل ټکی کام، ۱۳۹۸، وری ۱۴)
د کندهار په دامان ولسوالۍ کې د بهرنیو ځواکونو په هغه موټریز کاروان چاودنه شوې، چې په ګزمه راوتلی وو.
شمشاد ته یوې سرچینې د نوم نه ښودو په شرط ویلي، چې دا پیښه نن سهار د دامان ولسوالۍ د مرغان کېچه نومي سیمه کې رامنځته شوې ده.
د تلفاتو په اړه لا هم څه نه دي ویل شوي خو شمشاد د یوې بلې سرچینې له قوله لیکي، چې په چاودنه کې بهرنیو ځواکونو ته کوم تلفات نه دي اوښتي.
د دې پیښې مسؤلیت لا هم چا نه دی منلی خو اکثره وخت د داسې چاودونو مسؤلیت طالبان په غاړه اخلي.
تیره ورځ هم په همدې ولسوالۍ کې طالبانو د ۲ تنو بهرنیو ځواکونو د وژلو ادعا کړې وه.
په افغانستان کې میشتو بهرنیو ځواکونو د یوې پیښې په اړه هم لا تر اوسه له رسنیو سره مالومات نه دي شریک کړي.
