(کابل ټکی کام، ۱۳۹۸، غویی ۱۲)
د افغانستان د بيارغونې د څار ځانګړې اداره “سیګار” وايي، له دې وروسته د افغان حکومت او طالبانو تر منځ د حاکمیت پر څومره والي څارنه نه کوي.
په افغانستان کې د غوڅ ملاتړ ماموريت سيګار ته ويلي، دغه ارزونې چې څومره سيمه د طالبانو او څومره د حکومت سره ده؛ د دوی د پريکړو لپاره يې ارزښت محدود دی.
د امريکايي ځواکونو وياند ډګروال ډوېدبټلر وايي، ناټو نور په دې اړه راپورونه نه خپروي خو په وينا يې د طالبانو او حکومت د سيمو د اندازې معلومولو لپاره پټ معلومات ټولوي.
د سيګار مشر جان سوپکو ويلي، د امريکا له دغه پريکړې وروسته به د متحده ایالاتو مالیه ورکوونکي بې خبره پاتې شي چې په افغانستان کې يې پانګونه بريالۍ او که نه.
په تيره جنورۍ مياشت کې د سيګار په راپور کې ښودل شوي و چې د افغانستان څلورپنځوس سلنه خاوره باندې حکومت واکمن او يا نفوذ پرې لري او پاتې خاوره يې له طالبانو سره ده.
تر دې وړاندې داسې راپورونه هم ورکول شوي چې د افغانستان له نيمايي پر زیاته خاوره د طالبانو حاکمیت دی او يا نفوذ پرې لري چې حکومتي عسکر او منسوبين پکې فعاليت نه شي کولای.
د شنونکو په باور، سيګار، د ملکي وګړو د خونديتوب یا ورته ډول نورې ادارې اکثره د امريکايي پوځ تر نفوذ لاندې دي چې تر ډيره په خپلو راپورونو کې حقيقت نه وړاندې کوي.
