کوئټه: د وژل شوي طالب قومندان (محمد علم) په اړه جوړه شوې غونډه پای ته ورسېده

کابل ټکی کام۲۱مرغومې/۱۳۹۴، عمر بلوچ
له کوئټې څخه زمونږ همکار خبر را کوي، تېره ورځ د طالبانو یو لوړ پوړی قومندان مولوي محمد علم په دغه ښار کې د نا پېژانده وسلوالو له لورې ووژل شو چې په اړه یې نن یوه ستره غونډه جوړه شوه.
په غونډه کې ګنو علماوو او په زرهاوو خلکو ګډون کړی وو.
د غونډې پیل د قرانکریم په مبارکو آیتونو وشو، او هم پکې علماء کرامو خپلې علمي ویناوې وکړې، دوی د غونډې برخوالو، امارت او د مولوي محمد علم کورنۍ ته د نوموړي د وژل کېدو په اړه د تسلیت مراتب وړاندې کړل او دا ډول قربانۍ یې «اسلامي نظام» ته د لارې هوارولو په برخه کې یو لوی راز وبللو.
همدا راز په غونډه کې طالب ترانه ویوونکو هم په خپل وار سره د غونډې برخوالو ته خپلې ترانې واورولې.
د یادولو ده چې د غونډې په پای کې ټولو برخه والو په یوه غږ د طالبانو له مشرتابه ملا اختر محمد منصور اخوند سره خپل بیعت اعلان کړ.