(کابل ټکی کام، ۱۳۹۸، غویی ۳۰)
د کندهار ولايت په شاولي کوټ او د هلمند په ګرشک ولسوالۍ کې د ګډو ځواکونو د شپنيو عملياتو پر مهال د ميرمنو او کوچنيانو په شمول ګڼو ملکي خلکو ته مرګ ژوبله اوښتې ده.
دغه عمليات تيره شپه د شاوليکوټ د البک کاريز په سيمه کې شوي چې د ځايي خلکو په وينا د دوو ميرمنو په شمول پنځه ملکي وګړي پکې وژل شوي او دوه تنه نور ټپيان دي.
دغه راز د هلمد څخه خبرونه وايي چې د ګرشک په سيدانو سيمه کې هم ګډو ځواکونو عمليات او پلټنې کړي چې د بيرته تګ پر مهال يې په سيمه کې بمباري کړې او شپږ تنو ښځو او ماشومانو د وژل کيدو سربيره لس تنه نور ټپيان شوي دي.
ځايي اوسيدونکي وايي، په عملياتو کې ملکي وګړي په نښه شوي او په سيمه کې هيڅ وسله والو شتون نه درلود.
راپور زياتوي، په دواړو سيمو کې د عملياتو پر مهال ولسي خلکو ته درانه مالي زيانونه هم اوښتي او ګډو ځواکونو پيسې او ځيني قيمتي توکي هم له ځان سره وړي دي.
تر ډيره دغه ډول عمليات د ملي امنيت، صفریک، صفردو، صفر سې او د امريکايي بيزونو اړوند ځواکونو له خوا په خپل سر ترسره کيږي چې تر ډيره د بهرنيانو له خوا پرمخ وړل کيږي او زيان يې ملکي وګړي ګالي.
که څه هم طالبانو په بار بار له بشري ټولنو، بسټونو، یوناما څخه غوښتي چې د ګډو ځواکونو له خوا پر ملکي خلکو د دغه ډول وژنو د لړۍ بنديدو په اړه دې خپل غږ پورته او لازم اقدامات وکړي خو تر اوسه هيڅ يوه بنسټ په دې اړه جدي اقدامات نه دي کړي.
