رحمت الله نبيل: ټاکنيز کمېسيونونه د اشرف غني لپاره کار کوي
(کابل ټکی کام، ۱۳۹۸، غبرګولی ۲۳)
د امنیت او عدالت ټاکنيز ټيم وايي، حکومت د رڼو او عادلانه ټاکنو د ترسره کولو اراده نه لري او ټاکنيز کمېسيونونه د اشرف غني لپاره کار کوي.
د ولسمشر نوماند او د دغه ټيم مشر رحمت الله نبيل وايي، ټاکنيز کمېسيونونه د ارګ د لاس آلې ګرځيدلي دي.
نوموړي په یوه اعلاميه کې ويلي، چې اشرف غني د قانون خلاف پريکړې کوي او د عادلانه ټاکنو د ترسره کېدو شته فرصتونه له منځه وړي.
نبيل ادعا کړې چې د ولسوالانو، وزيرانو، ښاروالانو، امنيه قوماندانانو، د وزارتونو د مرستيالانو او سرپرستانو ګمارل د قانون خلاف او د راتلونکو ټاکنو مهندسۍ لپاره د ولسمشر په ګټه ترسره کيږي.
دغه راز د تدبير او پرمختګ ټاکنيز ټيم مشر فرامرز تمنا هم د ګډ حکومت پر مشرانو نيوکې کړي چې په وينا يې په غير قانوني توګه يې حکومت ته دوام ورکړی دی.
نوموړی د غبرګولي له لومړۍ نيټې وروسته د اشرف غني او ډاکټر عبدالله په واک کې پاتې کېدل د ډيموکراسۍ او اساسي قانون پر وړاندې کودتا بولي په خبره يې دغه کار بايد نه وای شوی او له یادې نيټې وروسته يې بايد واک سرپرستانو ته سپارلی وای.
