کابل ټکی کام (جمعه ، ۷ چنګاښ ، ۱۳۹۸ل)
پاکستان کې د افغانستان پخوانی سفیر عمر زاخیلوال هم دطالب اوامریکايي استازو ترمنځ دمذاکراتو له اهمیت خبر ورکړی، خوددې ترڅنګ یې راتلونکي پړاو ته هیله مندي هم ښودلې.
نوموړی وایي، اووم پړاو مذاکرات هیله بښونکي او تر ټولو مهم دي، ځکه په خبره یې دواړه لوري هوکړې ته چمتو شوي او په دې مذاکراتو کې د ډېر پرمختګ امکان دی.
زاخیلوال وايي، چې که دواړه لوري په دې پړاو مذاکراتو کې هوکړې ته ونه رسیږي، نو د سولې روانې هڅې به یو قدم شاتګ وکړي.
عمر زاخیلوال پاکستان ته د ولسمشر غني سفر ته په اشارې وايي، چې د حکومتونو تر منځ تګ راتګ مهم دی او ورته سفرونه د اعتماد فضا رامنځته کولای شي.
نوموړی پاکستان ته د ولسمشر غني د سفر څخه ملاتړ کوي او وايي، په دغو سفرونو کې باید د ملي ګټو په محور خبرې وشي نه د ملي ګټو په قیمت.
زاخیلوال وايي، په اوس وخت کې ټاکنې او سوله سره په تناقض کې دي، خو باید له ټاکنو وړاندې سوله وشي.
دده په باور، په سوله کې شفافې ټاکنې ترسره کېدای شي، ځکه چې مفسدین نشي کولی دقوي مرکزي حکومت په موجودیت کې دټاکنو پروسه ګډه وډه کړي.
