(کابل ټکی کام، ۱۳۹۸، چنګاښ ۹)
د میدان وردګو ولايت په چک ولسوالۍ کې د عملياتو پر مهال یو کور او یوه مدرسه نړولې او د مدرسې اووه تنه کوچنيان يې شهيدان کړي دي.
راپور زياتوي، دغه عمليات د يادې ولسوالۍ مربوط په د نیک پايکول درې په چهلګزيانو سيمه کې ترسره شوي دي.
ځايي اوسيدونکي وايي، عملياتي عسکرو د مدرسې اووه تنه کوچني زده کوونکي وژلي او مدرسه يې نړولې ده.
د سيمې یو تن اوسيدونکي جمعه ګل کابل ټکی کام ته وويل، د عملياتو پر مهال یو کور هم په بشپړ ډول ویجاړ شوی او د یوې مدرسې د استاد په شمول درې تنه کليوال ګډو ځواکونو د بنديانو په توګه له ځان سره وړي دي.
په وروستيو کې د ګډو ځواکونو عمليات زيات شوي چې تر ډيره د ملکي خلکو په ميشت ځایونو، مدرسو، بازارونو او کليو ترسره کيږي چې تلفات يې هم ملکي خلکو ته اوړي.
