(کابل ټکی کام، ۱۳۹۸، چنګاښ ۹)
د خوست د ولايتي شورا غړی لطف الله بابکرخيل وايي، د ګُربز ولسوالۍ پخواني امنيه قومندان د همدې ولسوالۍ د برحاله ولسوال عبدالحۍ ځاځي پر کور برید کړی چې امنیه قومندان پکې وژل شوی دی.
د بابکرخيل په وينا، د مرکز اړوند په څارن کوټ ښارګوټي کې د ولسوال کور دی چې لومړی امنيه قومندان قديرالله د ولسوال کور ته داخل شوی، د هغه ساتونکی يې ويشتلی او د کورنۍ پر غړو يې ورته ډزې کړي.
بابکرخيل وايي، په قديرالله د ولسوال د کورنۍ ميرمنو ډزې کړي چې پخوانی امنيه قومندان پکې وژل شوی او ساتونکی يې ټپي دی.
په عين حال کې د خوست والي طالب منګل پيښه تاييدوي په خبره يې په دې اړه به نور جزيات وروسته رسنیو سره شریک کړي.
د ګربز ولسوال عبدالحۍ ځاځی چې دا مهال کابل ته په رسمي سفر تللی وايي، قديرالله د نشه يي توکو معتاد او په ځينو جنايي پېښو کې په لاس لرلو هم تورن دی او په وروستيو کې يې غوښتل چې ځان د ګُبز امنيه قومندان مقرر کړي خو ده يې مخالفت کاوه.
قديرالله چې په ولسي جرګه کې د خوست د خلکو د استازي کمال ناصر اصولي ورور هم دی څو کاله يې د یادې ولسوالۍ د امنيه قومندان په توګه دنده کړې خو تير کال له دندې ګوښه شو.
