(کابل ټکی کام، ۱۳۹۸، چنګاښ ۱۳)
د تيرې جمعې په ورځ د امریکا او طالبانو تر منځ د قطر په مرکز دوحه کې د اووم پړاو مذاکرات پيل شول چې نن پنج شنبه به هم دوام وکړي.
په قطر کې د طالبانو د دفتر ویاند سهيل شاهين رسنيو ته ويلي، چې په اووم پړاو خبرو کې پرمختګونه شوي، پر ځينو مسائلو موافقې ته رسيدلي خو په وينا يې نن پنج شنبه به هم بحثونه دوام ولري.
په قطر کې طالبانو او امريکايي استازو ته نږدې سرچينې وايي، ښايي اووم پړاو مذاکراتو کې د دواړو غاړو تر منځ پر ځينو موافقو هوکړه وشي.
له تيرو څو مياشتو راهيسې امريکا له طالبانو سره د افغانستان د جګړې ختمولو، له افغانستانه د بهرنيو ځواکونو د وتلو پر سر خبرې روانې کړي دي.
د سولې خبرو لپاره د امريکا د بهرنيو چارو وزارت ځانګړي استازي تر دې مخکې ويلي چې هڅه کوي څو طالبان اوربند او له افغان حکومت سره خبرو ته چمتو کړي، خو طالبان په افغانستان کې اوسنی حکومت د امريکا ګوډاګی بولي زياتوي چې هيڅکله به د حکومت په استازيتوب چا سره خبرې ونه کړي.
ټاکل شوې چې د جولای مياشتې په اوومه او اتمه نيټه په دوحه کې د جرمني او قطر په کوربه توب یوه بين الافغاني غونډه جوړه شي چې د طالبانو په شمول به پکې یو شمير افغان سياستوال، د مدني ټولنو استازي او خبريالان ګډون وکړي.
