کابل ټکی کام (پنجشنبه ، ۱۳ چنګاښ ، ۱۳۹۸ل)
وسلوالو طالبانو دجوزجان ولایت په قوش تپې ولسوالۍ کې د ۱۵۰ دولتي سرتېرو له جملې څخه ۴۲ تنه دسپین ږیرو په وساطت او تضمین خوشې کړي، او ځینې مرستې یې هم ورسره کړي.
د دې ولایت دولتي چارواکو هم دطالبانو له لوري ددې سرتېرو خلاصون تائید کړی، اودایې یو نیک اقدام بللی.
ویل کېږي دغه سرتېري درې ورځې وړاندې د دغه ولایت د قوش تپې ولسوالۍ د سقوط پر مهال وسله والو طالبانو ژوندي نیولي وو.
د یاد ولایت امنیه قومندان سمونيار عبدالواحد وجدان وایي چې خوشي شوي سرتېري تېر ماښام شبرغان ښار ته رسېدلي دي.
وجدان دغه راز ویلي چې د قوش تپې ولسوالۍ د سقوط پر مهال څلور نادرکه شوي پوليس هم شبرغان ته راستانه شوي.
د طالبانو وياند ذبيح الله مجاهد په خپله ټویټر پانه لیکلي چې دقوتپې دسقوط پرمهال د ۱۵۰ عسکرو له جملې یې پرون ٤٢ کسان خوشي کړي دي.
دا لومړی ځل نه دی چې طالبان په پراخ تعداد دولتي عسکر خوشې کوي، بلکه تر دې پخوا هم په وار وار ددوی له لوري دولتي عسکر له تضمین وروسته خوشې شوي، او ځینې مرستې یې هم ورسره شوي.
عامو افغانانو ددې اقدام پراخ هرکلی کړی او له دولتي لوري یې هم د ورته اقدام غوښتنه کړې.
