کابل ټکی کام (جمعه ، ۴ زمری ، ۱۳۹۸ل)
د امريکا د بهرنيو چارو وزير مايک پومپيو دګډ حکومت له مشر اشرف غني سره ټلیفوني خبرې کړي، او په یوشمېر موضوعاتو یې دنظر تبادله کړې.
پومپیو ټينګار کړی چې اوس هغه وخت رارسېدلی چې د خبرو له لارې د افغان جګړې د پای ته رسېدو هڅې چټکې شي.
د امريکا د بهرنيو چارو وزارت څخه په يوه خپره شوې اعلاميه کې راغلې چې د چهارشنبې په ورځ مایک پومپيو او ولسمشر غني په ټيلفوني خبرو کې هوکړه وکړه تر څو د سولې روانې هڅې چټکې شي.
نوموړي ویلي، چې د امریکا د وسله والو ځواکونو لوی قوماندان جنرال ډانفورډ او ځانګړی استازی زلمی خلیلزاد یې د همدې لپاره کابل ته لیږلي ، چې د سولې په اړه د راتلونکو پړاوونو په اړه له نږدې خبرې اترې وکړي.
همدا راز پومپیو ولسمشرغني ته ډاډ ورکړی چې د جنوبي اسيا لپاره د امريکا په ستراتيژۍ کې هېڅ ډول تغير نه دی راغلی او له افغانستان څخه د امريکایي سرتېرو وتل به هم شرايطو ته په کتو تر سره شي.
داپه داسې حال کې ده چې طالب او امریکایي مذاکراتي پلاوي به د اتم پړاو مذاکراتو لپاره په نږدې راتلونکي کې یوځل بیا سره جرګه شي.
داځل هم دتېر په څېر هیلې شته چې ژر به دافغان اتلس کلنې جګړې پای او یوې واقعي سولې څرک تر سترګو شي.
