(کابل ټکی کام، ۱۳۹۸، زمری ۶)
د افغان سولې لپاره د امریکا ځانګړي استازي زلمي خليلزاد، طالبانو او د کابل حکومت د بين الأفغاني مذاکراتو د پیليدو خبر ورکړی دی.
د سولې په چارو کې د دولت وزارت وړمه ورځ په خپره کړې اعلاميه کې ويلي و چې د افغان حکومت او طالبانو تر منځ د مذاکراتو لپاره چمتووالی روان دی او تر راتلونکو دوه اوونيو به دغه مذاکرات پيل شي.
د یاد وزارت په اعلاميه کې ويل شوي چې د دغه مذاکراتو لپاره د پنځلس کسيز پلاوي د نومونو په نهايي کولو خبرې روانې دي.
دغه راز د افغان سولې لپاره د امريکا د بهرنيو چارو وزارت ځانګړي استازي زلمي خليلزاد هم په خپله ټويټرپاڼه ليکي، په کابل کې د بين الأفغاني مذاکراتو د پيليدو په اړه خبرې کيږي زياتوي دغه مذاکرات به د طالبانو او یو ټول شموله ملي ټيم چې په تشکيل کې به يې د حکومت د لوړپوړو مامورينو تر څنګ د ګوندونو، مدني ټولنو او ښځو استازي وي، ترسره شي.
خليلزاد ويلي، چې دا مذاکرات به د طالبانو سره زمونږ تر هوکړې وروسته ترسره شي.
که څه هم د سولې په چارو کې د ګډ حکومت وزارت په اعلاميه کې د (حکومت او طالبانو مذاکرات) نومونو یادونه کړې خو طالب وياند ذبیح الله مجاهد وايي، چې بين الافغاني مذاکرات به د ټولو سياسي جهتونو له مشترک مذاکراتي ټيم سره وي.
نوموړي په دې اړه په وضاحت کې ويلي، چې د کابل اداره به د حکومت په حيث نه بلکې د نورو سياسي جهتونو په څير یو جهت وي.
د مجاهد په وينا، دغه مذاکرات به له امريکايانو سره د مهالويش تر اعلان وروسته ترسره کيږي.
امريکا د طالبانو سره له تيرو څو مياشتو راهيسې له افغانستانه د خپلو ځواکونو د ايستلو په اړه خبرې روانې کړي چې د ښکيلو غاړو په وينا، امريکا دېته تياره شوې چې د خپلو ځواکونو د وتلو مهالويش اعلان کړي.
