(کابل ټکی کام، ۱۳۹۸، زمری ۶)
په کابل کې د پاکستان سفارت عامو افغانانو ته د ويزې په ورکولو محدوديتونه لګولي وايي، له دې وروسته یوازې سپين ږيرو، ناروغانو، ښځو او پانګوالو افغانانو ته ويزې ورکوي.
د پاکستان سفارت نن د یکشنبې په ورځ په خپره کړې اعلاميه کې ويلي، د کونسلګريو نه بهر د پيسو په بدل کې د پاکستان ويزې ترلاسه کېږي او تر څو چې افغان حکومت دغه چاره بنده نه کړي نو دوی به عامو افغانانو ته ويزې ورنکړي.
اعلاميه کې راغلي، چې دا یو عاجل اقدام دی او تر څو چې له کونسلګريو بهر د ويزو اخيستل بند نه شي تر هغې به يوازې د ډير عمر لرونکو، ناروغانو، ميرمنو او پانګوالو ته ويزې ورکول کيږي.
تر دې مخکې هم داسې راپورونه ورکول شوي چې په ننګرهار کونسلګرۍ او کابل سفارت بهر چارواکو ته نږدې کسان د پيسو په بدل کې د پاکستان ويزې ورکوي چې ډیری خلکو ته يې ستونزې جوړې کړي دي.
د راپورونو له مخې، له کونسلګرۍ او سفارت بهر د کمیشنکارانو له لوري د پاکستان ويزې د یوسل پنځوس تر دوه سوه ډالرو په بدل کې اخيستل کيږي.
دغه راز په کابل کې د افغان سفارت او ننګرهار کې د کونسلګرۍ مخې ته د ويزو د ورکولو پر مهال د ګڼې ګوڼې او بې نظمۍ له امله يې ډیر کله ښځې او د ډير عمر لرونکي کسان د سفارت او کونسلګرۍ د ساتونکو له خوا افغانان وهل شوي او بې عزته شوي دي.
په داسې حال کې دا بنديز لګول شوی چې دا مهال د پاکستان د سرحداتو وزير شهريار افريدي افغانستان ته په سفر تللی او تيره ورځ يې یوې خبري غونډې ته ويلي و چې افغانانو ته به د پاکستان ويزې اخيستلو کې اسانتياوې رامنځته کړي او د ويزو ورکړه به لا زياته کړي.
