کابل ټکی کام( دوشنبه، ۷زمری، ۱۳۹۸)
امریکایي ولسمشر ډونالډ ټرمپ اعلان کړی چې د ده په اداره کې د استخبارانو مشر ” ډان ګوټس” به په راتلونکې اګست میاشت کې خپله دنده پریږدي.
که څه هم د نوموړي د دندې پریښودو اصلي لامل نه دی څرګند شوی خو ټرمپ او دی به ډیری وخت د شمالي کوریا، روسیې او ایران په مسئله کې په جدا جدا نظرونو ول او اختلافات یې زیږول.
که څه هم ګوټس ویلي وو چې ډنالډ ټرمپ د ده له استعفا سره مخالف دی او ترې غواړي چې پخپله دنده پسې پاته شي خو داسې ښکاري چې دوی دواړه نه دي سره غاړه غړۍ شوي.
ټرمپ ویلي چې د نوموړي په ځای به په کانګریس کې د تکزاس استازی “جان راټکلېف” د امریکا د استخباراتو مشر کړي.
د یادونې وړ ده چې له ډونالډ ټرمپ سره په خپله اداره کې ډیری خلک مخالف دي او دا څووم مشر دی چې لار ترې بیلوي.
