ننګرهار: ګډو ځواکونو ليسه ویجاړه او شپږ ملکيان وژلي
(کابل ټکی کام، ۱۳۹۸، زمری ۹)
د ننګرهار ولايت په شيرزادو ولسوالۍ کې د ګډو ځواکونو په عملياتو ملکي خلکو ته مالي او ځاني زیانونه اوښتي دي.
د شيرزادو ولسوالۍ اوسيدونکي وايي، دغه عمليات تيره شپه د ګندومک په سيمه کې ترسره شوي چې پر مهال يې د ګڼو کورونو دروازې ماتې کړي، د خلکو څاروي يې وژلي، او په بمبارۍ کې يې د یادې سيمې ښوونځی هم ويجاړ کړی دی.
د ګندمک د قاضي کلا اوسيدونکی رحمان ګل وايي، د چاپې عسکرو د خان سید په نوم یو موټر چلوونکی، حاجي حبيب الله، د سيمې د یوه مخور ملا عبدالباري درې زامن او یو زوم وژلي او دوه تنه نور ټپيان دي.
ځايي اوسيدونکي وايي، یادو کسانو هيڅ کومې وسله والې ډلې سره اړيکې نه لرلې.
د ننګرهار چارواکي هم تاييدوي چې په یاده سيمه کې عمليات شوي خو تر اوسه يې د ملکيانو د وژل کيدو په تړاو څه نه دي ويلي.
له تيرې ډيرې مودې راهيسې د هيواد په بیلابیلو سيمو کې د ګډو ځواکونو له خوا په ملکي میشت ځايونو شپني عمليات ترسره کيږي چې تر ډيره يې قربانيان ملکي وګړي دي.
