(کابل ټکی کام، ۱۳۹۸، زمری ۱۰)
د افغان سولې لپاره د امريکا د بهرنيو چارو وزارت ځانګړی استازی زلمی خليلزاد وايي، اسلام اباد کې به د هغه هيواد له چارواکو سره تر کتنې وروسته په دوحه کې له طالبانو سره وګوري.
نوموړي په خپله رسمي ټويټرپاڼه ليکلي، له څه وخته مې چې د امريکا د ځانګړي استازي په توګه کار پيل کړی تر ټولو ګټور سفر په افغانستان کې پای ته رسوم زياتوي: “ متحده ایالتونه او افغانستان پر راتلونکو ګامونو موافقه کړې، مذاکرتي پلاوی او تخنیکي ملاتړې ډله د وروستي کېدو په حال کې ده”.
خليلزاد په یوه بل ټويټ کې ليکي، چې دوحې ته روان دی خو لومړی په اسلام اباد کې یوه دمه کوي.
نوموړی وايي، که طالبان د خپل اړخ چارې ترسره کړي موږ به خپلې چارې ترسره کوو او هغه هوکړه به نهايي کړو چې تر اوسه مو کار پرې کړی دی.
ټاکل شوې چې نن د امریکا او طالبانو تر منځ بل پړاو خبرې د قطر په مرکز دوحه کې پيل شي.
په قطر کې د طالبانو د سياسي دفتر وياند سهيل شاهين وايي، په نوي پړاو پيلېدونکو خبرو کې ښايي د امريکا او طالبانو تر منځ يوه موافقه ترسره شي.
له تير شاوخوا یوه کال راهيسې امريکا د افغان جګړې ختمولو، او ځواکونو ايستلو په اړه له طالبانو سره خبرې روانې کړي دي.
