(کابل ټکی کام، ۱۳۹۸، زمری ۱۴)
د کندهار ولايت په شاوليکوټ ولسوالۍ کې پوليسو پر خپلو پوليسو ملګرو بريد کړی چې په ترڅ کې يې ګڼ شمير وژل شوي او ځينې نور ټپيان دي.
د کندهار د امنيې قومندانۍ ویاند جمال ناصر بارزکی وايي، یاده پېښه د کندهار- ترینکوټ تر منځ د لويې لارې پر سر په تورکوتل سيمه کې رامنځته شوې ده.
نوموړي په دې اړه ډير جزيات نه دي ورکړي.
طالبانو د بريد مسؤوليت منلی ویاند يې قاري يوسف احمدي ويلي، بریدګر په افغان پوځ کې د دوی نفوذي کسان و چې په دوو پوستو کې يې پر پوليسو بريدونه کړي دي.
د احمدي په وينا، په یادو بريدونو کې څوارلس عسکر وژل شوي او د هغوی نهه ميلې وسلې هم بریدګرو پوليسو طالبانو ته ور رسولي دي.
دا په داسې حال کې ده، چې تيره اوونۍ د کندهار په شاوليکوټ ولسوالۍ یوه عسکر پر امريکايي پوځيانو برید وکړ چې په ترڅ کې يې دوه امریکايي پوځيان وژل شوي و.
