(کابل ټکی کام، ۱۳۹۸، زمری ۱۴)
په وروستيو کې له افغانستانه د امریکايي ځواکونو د وتلو راپورونو سره سم ويل کيږي چې د ځواکونو د وتلو لړۍ پيل شوې ده.
سپوږمۍ راډيو د ځينو امریکايي رسنيو له قوله ليکلي، یو شمير امریکايي عسکر چې باید په افغانستان کې په دوره يې توګه ماموریت ترسره کړي ځينې يې خپلو پوځي اډو ته ستانه شوي دي.
د سرچينې په وینا، تازه د امریکا د کلوریدا ایالت یوه درې سوه کسیزه پوځي ډله چې پکې پوځيان، پيلوټان، مشاورين، روزونکي ، روغتيايي کارمندان او افسران شامل دي له افغانستانه ستنه شوې ده.
څو ورځې مخکې د امریکا ولسمشر ډونالډ ټرمپ ويلي و څومره چې ژر کيدلای شي بايد له افغانستانه خپل پوځيان ستانه کړي.
په عين حال کې د امریکا د بهرنيو چارو وزير مايک پامپيو هم ټینګار کړی چې ټرمپ غواړي له ديپلوماتيکو لارو له افغانستانه خپلو ځواکونو پوځي تجهيزاتو ايستلو لپاره زمینه برابره کړي.
د “اېن.بي. سي” ټلوېزيوني چينل راپور ورکړی چې ډونالډ ټرمپ خپلو سلاکارانو ته ويلي چې غواړي د ٢٠٢٠ میلادي کال انتخاباتو پورې امريکايي سرتېري له افغانستان څخه وباسي.
له تيرو دوو ورځو راهيسې د امریکا او طالبانو تر منځ اتم پړاو مذاکرات روان دي چې ويل کيږي امریکا د ځواکونو ايستلو ته موافقه ښودلې او طالبان به هم دا ضمانت ورکوي څو له افغانستانه امريکا ته ګواښ پېښ نه شي.
ښايي په دغه ناسته کې د روسيې، چين، ملګرو ملتونو او څو نورو هيوادونو په شتون کې د امریکا او طالبانو تر منځ هوکړه لاسليک شي.
