کابل ټکی کام( چهارشنبه، ۱۵زمری، ۱۳۹۸)
نن د کابل ښار په شپږمه امنیتي حوزه کې د ملي اردو په مرکز د طالبانو لخوا موټربم برید ترسره شو چې لسګونه امنیتي کسانو ته پکې مرګ ژوبله واوښته.
د کورنیو چارو وزارت په برید کې د ۱۴ کسانو د وژل کیدو او تر سلو زیاتو نورو کسانو د ژوبلیدو خبر ورکړی دی.
حکومتي چارواکو د طالبانو لخوا ننی ترسره شوی برید سخت غندلی دی
طالبانو یې په غبرګون کې توند ځواب ویلی او د لا سختو بریدونو خبرداری یې ورکړی دی.
طالب ویاند ذبیح الله مجاهد په خپل ټویټر لیکلي چې د دوی “دښمن” فکر کاوه چې طالبان له برید کولو ولیدلې او کمزوري شوي خو په وینا یې چې ننی ترسره شوی برید په کلیو کې د حکومت د ترسره شویو جنایاتو ځواب دی.
د مجاهد په ټکو: “کله چې زموږ مجاهدینو په لویو ښارونو کې د دښمن په ځالو عملیات کم کړل، دښمن هغه خپله بریا او د مجاهدینو کمزوري تلقي کړه.
کله مو چې ورته وویل، په کلیو او بانډو کې په ملکي خلکو بمبارونه مه کوئ او چاپې مه وهئ، دوی فکر وکړ چې مجاهدین له دې عملیاتو ډير په تنګ دي، لا يې شدت ورکړ.”
مجاهد وړاندې لیکلي دي: “نن چې په کابل کې د خپل ترسره کړي جنایت حساب ورکوي، نارې وهي چې طالبان ولې لوی بریدونه کوي. دا بریدونه ستاسو د ورځینو جنایاتو غبرګون دی، تاسو به اوس په کلي او اطرافو کې د هر ترسره کړي جنایت حساب په کابل او نورو ښارونو کې نغد ورکوئ، په ښارونو کې به ستاسو ځالې له منځه وړل کیږي”
