کابل ټکی کام (چهارشنبه ، ۱۶ زمری ، ۱۳۹۸ل)
دپاکستان حکومت په یوې تازه پرېکړه کې د هند د سفیر د شړلو او له هند سره د هر ډول تجارتي اړیکو د ختمولو اعلان کړی دی.
دا ګام وروسته له هغه پورته کېږي چې هند دوه ورځې وړاندې تر خپلې ولکې لاندې کشمیر د ځانګړي حیثیت ختمولو پرېکړه او هلته یې زرګونه پوځیان ځای پر ځای کړل.
د پاکستان د حکومت په اعلامیه کې راغلي، ‘لومړي وزیر عمران خان په کشمیر کې د هند نژاد پاله چلند او له بشري حقونو سرغړونو د افشا کولو لپاره د ټولو دیپلوماتکیو لارو چارو د کارولو هدایت کړی دی. ‘
په اعلامیه کې همدا راز راغلي چې لومړي وزیر عمران خان د پاکستان پوځ ته د “بیدار اوسېدو” امر کړی دی.
بل لور ته د ځانګړي قانوني حیثیت له پای ته رسېدو وروسته د هند تر کنترول لاندې کشمیر کې د عادي ژوند چارې په ټپه ولاړې ښکاري، خو د حکومتي پرېکړې پر ضد لاریونونه پیل شوي دي.
دهند تر ولکې لاندې کشمیر ته تللي خبریالان راپور ورکوي چې هرې خواته لسګونه زره پوځیان لیدل کیږي، دخلکو په تګ راتګ بندیز او حالات جنګي بریښي.
بلې خوا بیا دهند په پلازمینه کې یوشمیر وګړو لاریون پیل کړی، دهند داپریکړه یې غندلې، او ژر تر ژره یې کشمیر ته دپخوانیو حقوقو داعادې سپارښتنه کړې.
دپاکستان لومړي وزیر په دې اړه اندیښنه ښودلې، اوګواښ یې کړی چې ډیر ژر به د ملګرو ملتونو دامنیت شورا ته دهند دوروستیو بشر ضد جنایاتو په اړه شکایت ثبت کړي.
دیادونې وړ ده چې هند اوپاکستان تردې وړاندې هم یوپربل نظامي اقدام کړی چې داځل هم یوبل ته ګوته په ماشه ښکاري.
احتمال شته چې دتېر په څیر دادواړه هیوادونه یوځل بیا په نظامي کش مکش واوړي.
