کابل ټکی کام( چهارشنبه، ۱۵زمری، ۱۳۹۸)
تیره ورځ ځینو رسنیو خبر ورکړ چې د ملا برادر اخوند په مشرۍ د طالبانو یو پلاوی ازبکستان ته روان دی.
نن مازدیګر د طالبانو ویاند ذبیح الله مجاهدهم په خپل ټویتر ازبکستان ته د ملا عبدالغني برادر په مشرۍ د یوه هیئت د تګ خبر ورکړ.
مجاهد ویلي چې دا هیئت به هلته د ازبکستان د بهرنیو چارو له وزیر او یو شمیر نورو لوړپوړو دولتي چارواکو سره وګوري.
د مجاهد په ټکو: “نن له غرمې مخکې د اسلامي امارت د سیاسي چارو مرستیال محترم ملا برادر اخند په مشرۍ د اسلامی امارت یو لوړ رتبه پلاوی ازبکستان ته د هغه هیواد په رسمي بلنه روان شو، چې هلته به د ازبکستان د بهرنیو چارو له وزیر او نورو لوړ رتبه چارواکو سره په اړوندو موضوعاتو خبري اترې وکړي.”
د یادونې وړ ده چې په دې وروستیو کې د طالبانو سیاسي سفرونه د پخوا په پرتله زیات شوي او په یوه میاشت کې دا دوهم مهم سفر دی چې طالبان یې بهرني هیواد ته ترسره کوي.
طالبانو تر دې وړاندې روس، چین، ایران او اندونیزیا ته سفرونه وکړل چې هلته یې په لوړه کچه استقبال وشو او د کوربنو هیوادونو لوړپوړو چارواکو ورسره لیده کاته وکړل.
