کابل ټکی کام (پنجشنبه ، ۲۴ زمری ، ۱۳۹۸ل)
راپورونه وایي چې کشمیر کې هندي او پاکستاني پوځیانو یو پر بل ډزې کړي؛ دواړو خواوو ته مرګ ژوبله اوښتې.
پاکستاني چارواکو د هندي او پاکستاني پوځیانو تر منځ دې نښته کې خپل لوري ته دخپلو درې تنه پوځیانو وژل منلي دي.
د پاکستاني پوځ رسنیز دفتر ادعا کړې چې ځوابي برید کې پنځه هندي پوځیان هم وژل شوي او یو شمېر نور ټپیان شوي دي.
بل لور ته د هند اي این ای خبري اژانس پر ټویټر د هندي پوځي چارواکو له قوله د پاکستاني لوري دغه ادعا رد کړې چې ګواکې د کشمیر جلا کوونکې کرښې (ایل او سي یا لاین اف کنټرول) اوږدو کې د متبادلو ډزو لړ کې هندي پوځیان وژل شوي دي.
د هندي رسنیو په رپوټونو کې د هندي پوځي چارواکو له قوله ادعا شوې چې پونچ سیمه پاکستاني پوځیانو له اوربنده سرغړونه کړې.
له دې مخکې د هند لومړي وزیر نرېندرا مودي ویلي و، د کشمیر ایالت د ځانګړي حیثیت ختمولو پرېکړه به د دې سبب شي چې د دې سیمې پخوانی ویاړ بېرته را ژوندی شي.
ددې په ځواب کې پاکستاني صدراعظم عمران خان دهندي حکومت له لوري دا اقدام غندلی، او دامنیت شورا ته یې دشکایت ګواښ کړی .
پاکستان او هند دوه هغه رقیب هېوادونه دي چې دخونړیو جګړو سابقه لري، اوپه دې وروستیو کې ددې دواړو ممالکو ترمنځ داړیکو ترینګلتیا اوج ته رسېدلې.
