چارواکي: جلال اباد ښار کې څلور چاودنې شوي

(کابل ټکی کام، ۱۳۹۸، زمری ۲۸)

نن د زمري د مياشتې ۲۸ چې د افغانستان د خپلواکۍ د ورځې سره برابره ده په جلال اباد ښار کې په داسې حال کې څلور چاودنې شوي چې خلک د دغه ورځې په لمانځنې بوخت و.

د ننګرهار چارواکي وايي، دغه چاودنې د جلال اباد ښار په بيلابيلو سيمو کې نن د دوشنبې په ورځ له غرمې مخکې شوي دي.

ځينو رسنيو د پنځو چاودنو راپورونه ورکړي دي.

د ننګرهار د امنيې قومندانۍ ویاند مبارز اتل وايي، تر اوسه د چاودنو له سيمو شپاړلس ټپيان روغتونونو ته وړل شوي چې له ډلې يې د درې تنو روغتيايي وضعيت ښه نه دی.

یوه چاودنه د جلال اباد ښار د عیدګاه مسجد تر څنګ شوې چې پنځه تنه يې ټپيان کړي خو د نورو چاودنو د ځای په اړه چارواکو معلومات نه دي ورکړي.

جلال اباد ښار کې وخت ناوخت ځينې چاودنې او بریدونه کيږي چې ملکي خلکو ته پکې زيان اوړي او د ورته ډول یو شمير چاودنو او بريدونو پړې داعش وسله والې ډلې په غاړه اخيستي دي.

خو تر دې دمه د دغه چاودنو مسؤوليت چا په غاړه نه دی اخيستی.