کابل ټکی کام (پنجشنبه ، ۷ وږی ، ۱۳۹۸ل)
دپاکستان صدراعظم عمران خان له خلکو غوښتي چې د هند د اقداماتو پر ضد او د کشمیر پر ملاتړ دې پراخ لاریونونه وکړي.
عمران خان تازه ویلي، دی د کشمیر د خلکو له حقوقو دفاع کوي او پاکستاني وګړو ته هم په کار ده چې ددې موخې لپاره لارو او کوڅو ته راووځي او پراخ لارینونه وکړي.
خان او نورو پاکستاني چارواکو ویلي دوی په هېڅ صورت د کشمیر په اړه د هند یو اړخیز اقدامات نه شي زغملی.
په دې وروستیو کې دکشمیر د مسئلې پر سر د پاکستان او هند ترمنځ ناندرۍ اوج ته رسېدلې دي.
چین، امریکا، ملګرو ملتونو او نورو سیمه ییزو هېوادونو پر دواړو لوریو د زغم او حوصلې او ددې قضیې له سولییزو لارو دحلېدا غږ کړی دی.
پاکستان نږدې یوه ونۍ وړاندې دملګرو ملتونو امنیت شورا ته دکشمیر په اړه شکایت وکړ، خو دامریکا ولسمشر دواړو هېوادو ته ددې کړکېچ د خپلمنځي ختمېدا او اختلافاتو راکمولو سپارښتنه کړې وه.
