(کابل ټکی کام، ۱۳۹۸، وږی ۱۷، یکشنبه)
طالبانو سره د مذاکراتو په اړه د ټرمپ د وروستي ټويټ په اړه ارګ په غبرګون کې د دغه خبرو د خنډ لامل په افغانستان کې د طالبانو جګړه بللې ده.
ارګ په خپره کړې اعلاميه کې ويلي، چې حکومت سولې ته ژمن دی، د سولې مشورتي لويې جرګې پريکړو ته درناوی لري او د یادې جرګې د وړاندې شوې کړنلارې تعقيبول خپل مسؤوليت ګڼي.
د ارګ په اعلاميه کې رغلي، چې د افغانستان دولت د سولې په تړاو د خپلو متحدینو صادقانه هڅې ستايي او ژمن دی چې په راتلونکي کې د امریکا متحده ایالاتو او نورو متحدینو سره د تلپاتې او باعزته سولې په راوستو کې په ګډه کار وکړي.
دغه راز ارګ په راتلونکو ولسمشريزو ټاکنو ټينګار کړی په وینا يې له دې لارې د یوه قوي، قانوني او مشروع حکومت رامنځته کيدل غواړي څو د سولې پروسه مخته یوسي.
دا په داسې حال کې ده، چې نن د امریکا ولسمشر ډونالډ ټرمپ په يوه اعلان کې له طالبانو سره د سولې خبرې لغوه کړې.
ټرمپ ويلي، یادې خبرې يې ځکه لغوه کړي چې د پنجشنبې په ورځ په کابل کې د یوه بريد پر مهال یو امريکايي، یو رومانيايي پوځي ووژل او څو نور کسان هم پکې ووژل شول.
تر اوسه طالبانو د ټرمپ وروستيو څرګندونو ته غبرګون نه دی ښودلی.
