لیکوال: امین وردګ
امریکا او متحدینو یې په دغو شپو – ورځو کې هم احساساتي پرېکړو ته کش ورکړی او هم عام وژنو ته! نو چې دوی مات، که لېوني شول چې وار یې پر ځای نه لګیږي او حوصلې یې ختمې شوې؟
دوې ورځې وړاندې د امریکا ولمشر )ټرمپ( د سولې په هکله هغه مهال احساساتي پرېکړه وکړه چې په کابل کې یې) د دوی له قوله( یو خپل کس او یو متحد د طالبانو په ګذار کې ووژل شول.
د یکشنبې په ماسخوتن)۱۳۹۸/۶/۱۷ ه – ل( یې د وردګو په تنګي دره کې په هغې سراچه موټر هوایي برید وکړ چې پکې ناستو کسانو ته یې خپلوانو)لوښی( کړی ؤ))لوښی وردګ هغې مېلمستیا ته وایي چې په کوم کور کې مړی وشي، بیا د دغه کور خلک او نږدې خپلوان یې و خپل کور ته مېلمانه کړي؛ تر څو له هغوی سره هم خپله غمشریکي وښیي او هم د هغوی څه – ناڅه غم لږ ور کم کړي(( نو ویل کیږي چې د دغه غموهلي کور څښتن ډاکټر ګل رحیم نومېدلو او د کابل وردګو په لاره به یې ټیکسي چلوله؛ چې په همدغې ورځ) مخکې له غرمې( یې زوی په هوايي برید کې شهید او ماسخوتن دی په خپله، سره له شپږو نورو کسانو – چې په شمول د زوم یې ټول عام وګړي وو- بیا د وحشي غربیانو ) چې په سر کې یې فتنه ګره امریکه ده( په هوايي برید کې شهیدان شول، مګر ړندې امریکا دا تشخیص ونشو کړلای چې دا ټول عام خلک وو.
که ووایو چې امریکا د افغانستان تر ټولو اوږدې جګړې لېونۍ او سربداله کړه) ځکه یې وار خطا ځي( هم پر ځای ادعا ده او که دا ووایو چې امریکا ماته شوې او وارخطا ده ؛ نو هم بې ځایه نه ده! ځکه چې طبعاً په داسې حالت کې مغز له کاره لویږي، تشخیص ناممکن شي او حواس سم کار نه کوي، نو له همدې امله ده چې عقل مغلوب او کینه غالبه شي؛ نو نتیجتاً! هدف ورک او وار هم خطا ځي.
او که دا ووایو چې امریکا قصداً دا کار کوي تر څو عام اذهان مخشوش کړي، په خلکو کې وېره، تشویش او ترهه را پيدا کړي، بل دا چې په دې توګه افغانان و ځوروي؛ هم بې ځایه نه ده.
خو په هر صورت!
امریکا د افغانانو ګډه دښمنه ده.
که دولت وایي چې نه! له موږ سره دښمني نه لري نو هغه دوې – درې ورځې مخکې د ننګرهار پېښې ته دې پام وکړي او هغه مهال به لا ښه ورته معلومه شي چې کله تښتي او دوی د الوتکې له دروازې څخه بېرته را وشړي او د کړېدلیو افغانانو رحم ته یې پرېږدي.
مګر د ننګرهاري ځوانانو کورنۍ خو بیا هم تر موږ خوشبخته وه؛ ځکه چې هم ستانکزي استعفا وکړه او هم یې اشرف غني غږ واورېد؛ اما زموږ غږ خو پرته له یوه الله بل څوک نه اوري او نه یې ورته کوو؛ بلکې له دښمن سره یې تلو او ګزوو یې ورسره، بیا یې پسې ماتوو او شړو یې ان شاءالله
ځه کبرجنې امریکې! له الله نه مو داسې شرمینده غوښتې یې چې د تېښتې پر وخت دې خپل او متحدین هم په بمونو وولې او تشې غوښې یې درسره یوسې.
بچو! تاسو د افغانانو تاریخ سطحي لوستی! قسم په خدای چې سردرګم او حیران به مو کړي ، بیا به د تېښتې لوری هم درنه ورک شي! نو ښه به دا وي چې نور ځانونه خجل او شرمینده نکړئ، زموږ له خاورې ورک شئ، کتې – متې مو وتړئ، تانګونه مو کش کړئ او دا مزدوران مو هم درسره بوزئ ځکه چې موږ یې نشو درته ساتلای، کني نو لوری به درنه ورک شي ان شاءالله.
