د تخار چارواکي: له ينګي قلعه وروسته نن د درقد ولسوالۍ هم طالبانو سقوط کړه
(کابل ټکی کام، ۱۳۹۸، وږی ۱۹، سه شنبه)
د تخار ولايتي چارواکي وايي، چې د ینګي قلعه ولسوالۍ له سقوط وروسته طالبانو د درقد ولسوالۍ هم تر خپلې ولکې لاندې راوستې ده.
د تخار د والي ویاند جواد هجري وايي، طالبانو نن سهار پر یاده ولسوالۍ جګړه پيل کړې او څو شيبې مخکې يې ونيوله.
دغه راز د تخار د ولايتي شورا غړي عصمت الله قرباني او مير احمد قسيم اريانا نيوز ته ويلي چې له درقد څخه دولتي ځواکونه وتلي او ولسوالۍ د طالبانو لاسته لويدلې ده.
طالب ویاند ذبیح الله مجاهد په خپله رسمي ټويټرپاڼه د درقد ولسوالۍ د نيولو خبر ورکړی په وينا يې په جګړه کې ګڼ شمير عسکر او پوليس وژل شوي، په زياته اندازه وسلې او مهمات د طالبانو لاسته لويدلي دي.
دا په داسې حال کې ده چې له تيرو څو وروځو راهيسې د ینګي قلعه ولسوالۍ کلابنده کړې وه او نن سهار يې د سقوط خبر ورکړل شو.
دا شپږمه ولسوالۍ ده چې طالبان يې په تيرو دوو ورځو کې له دولتي ځواکونو نيسي او عسکرو ته پکې درنه مرګ ژوبله اوړي.
