کابل ټکی کام (پنجشنبه، ۲۱ وږی ، ۱۳۹۸ل)
نن له غرمې وروسته د کابل ولایت په ریشخورو نامي سیمه کې ددولتي کمانډویي ځواکونو په قرارګاه موټر بم برید درنده مرګ ژوبله اړولې ده.
وسلوالو طالبانو دیاد برید مسئولیت منلی دی، او دیوې خبر پاڼې په ترڅ کې یې ادعا کړې چې تر ۲۰۰ کمانډویي او نورو دولتي سرتېرو ته یې مرګ اړولې ده.
طالبان وایي، دغه برید چې دملا احمد وردګ په نام هغه بریدګر لخوا د منفجره موادو څخه د ډک موټر په مټ ترسره شو چې په موټر کې ګڼ شمیر کمانډويي عسکر هم ورسره سپاره وو او د قرارګاه منځ ته داخل شوی و.
طالبان وړاندې لیکي، یاد بریدګریې له ډيرې مودې راهیسې په نوموړې قرارګاه کې دننه د همداسې یوه کاري ګوزار لپاره ځای پر ځای کړی وو چې نن خپل هدف ته ورسېد.
طالبان علاوه کوي، یاده قرارګاه کې د کمانډو عسکرو هغه ۲۰۰ تنه عسکر په نښه شول چې د نورو موټرو ورتګ ته انتظار وو او د عملیاتو لپاره مختلفو ساحوته استول کیدل چې د انفجار په رامنځته کیدو سره ټول عسکر وژل شوي او د قرارګاه اکثره برخه نړیدلې ده.
طالبانو دخپلې اعلامیې پر وروستۍ برخه کې ننی برید دولسي وګړو په کورونو دوروستیو چاپو یو انتقامي برید بللی، او یوځل بیا یې چاپه وهونکو عساکرو ته اخطار ورکړی چې دوی دې ددغسې لړزونکو بریدونو لپاره لاهم انتظار وکړي.
