کورنیو چارو وزارت: د ټاکنو امنيت لپاره سل زره عسکر چمتو شوي
(کابل ټکی کام، ۱۳۹۸، وږی ۲۵، دوشنبه)
د کورنیو چارو د وزارت ویاند نصرت رحيمي وايي، د ۲۰۱۹م کال د ولمشرۍ ټاکنو د امنیت لپاره سل زره عسکر چمتو شوي دي.
د رحيمي په وینا، په دغه عسکرو کې به ۷۲۰۰۰زره د ټاکنو امنیت ساتنې دنده په غاړه لري او ۳۰۰۰۰ نور به هم منتظر وي چې د ضرورت پر وخت به اقدامات ترسره کوي.
د ټاکنو کمېسیون وايي، د ولسمشرۍ ټاکنو لپاره څه باندې يوولس میليونه رايو پاڼې چاپ شوي او ټولو ولايتونو ته د ټاکنيزو موادو د ليږد لړۍ بشپړه شوې، یوازې ولسواليو ته ليږل يې پاتې دي.
په تيرو ولسمشريزو ټاکنو کې د انتخاباتو لپاره ۶۷۷۵ د رايو مرکزونه پرانيستي و خو سږ کال د انتخاباتو د مرکزونو شمير له پنځو زرو هم کم شوی چې لامل يې نا امني شودل شوې ده.
د تلي مياشتې شبږمه چې د روان ميلادي کال د سپتمبر له ۲۸ نيټې سره سمون خوري د افغانستان د ولسمشرۍ انتخاباتو ورځ ټاکل شوې ده.
ډيری افغانان وايي، چې پر ټاکنو يې باور له لاسه ورکړی او د شنونکو په باور په ټاکنو کې د درغلیو او نا امنیو له کبله ښايي د اطرافي سيمو ترڅنګ په ښاري سيمو کې هم خلک د ټاکنو ځای ته ولاړ نه شي.
تر دې مخکې طالبانو ګواښ کړی چې ټاکنې به ګډوډوي او خلک يې انتخاباتي مرکزونو ته له ورتګ منع کړي دي.
