کابل ټکی کام (پنجشنبه، ۲۸ وږی ، ۱۳۹۸ل)
راتلونکو ولسمشریزو ټاکنو ته نوماند سید نورالله جلیلي یوځل بیا ویلي، چې دخپلې بریا په صورت کې به جمهوري نظام اسلامي امارت ته تبدیل کړي.
ښاغلی جلیلي زیاتوي، د اسلامي امارات په راتګ سره د ټولو افغانانو حقوق په مساوي ډول تضمین کېدای شي، اوهیڅوک به دظلم وحشت او بربریت ښکار نشي.
هغه دا خبرې نن د ازادۍ راډیو سره په یوه مرکه کې کړي دي، دی وایي: اسلامي امارت د پیغمبرانو او خلفاو طریقه ده او جمهوري هغه نظام دی چې د بشر په لاس جوړ شوی اوناقص دی.
جلیلي دخپلې مرکې پر دوام وایي، که زه ولسمشر شم، ژر تر ژره به د اساسي قانون لویه جرګه را وغواړم او هلته به د افغانستان جمهوري نظام، اسلامي امارت ته واړوم.
جلیلي دخپلو برنامو پربیان ویلي، هغه ټول نامعلوم اړخونه چې طالبان یې په مقابل کې هره ورځ لسکونه افغانان وژني، هغه ټول به حل کړم، د دې لپاره چې دلته د افغانانو د ژوند مسئله ده.
ښاغلي جلیلي وویل، د اړتیا په صورت کې به دملي سرود او درې رنګه بیرغ بدلون هم دده له انتخاباتي برنامو څخه وي.
ښاغلي جلیلي تېره شپه په کابل کې په یوه شخصي ټلویزیون کې د یوې مناظرې پر مهال ویلي چې د طالبانو مبارزه داشغال خلاف د شاه امان الله خان لاره ده.
هغه د ازادۍ راډیو سره په مرکه کې دا هم ویلي، چې د طالبانو جګړه په افغانستان کې مشروعیت لري ځکه چې داډله دامریکایي او افغاني پوځیانو له لوري ځپل شوې او جګړې ته مجبوره سوې.
د ګډحکومت يو ویاند صدیق صدیقي دې خبرو سخت پر غصه کړي او غوښتنه یې کړي چې نوموړي نوماند څخه دې اړوندې ادارې د دغو څرګندونو په اړه پوښتنه وکړي ځکه چې دغه څرګندونې غیر مسؤلانه او د هېواد ملي امنیت ته ګواښ دي.
خو نورالله جلیلي ارګ او اجرائیه ریاست دغبرګونونو په ځواب کې ویلي، که دوی له ما څخه څه نا څه پوښتنې شروع کړي، زه به له هغوی څخه سلګونه مواردو کې پوښتنې وکړم.
جلیلي له هغو ټولو نوماندانو یو بلل کیږي چې دافغانانو ټولو اسلامي او افغاني ارزښتونو ته درناوی لري، اوهمېش دسولې راتګ لپاره هر راز همکاریو او قربانیو ته سینه ډبوي.
